آٹھ محرم الحرام،شہر بھر میں سکیورٹی ہائی الرٹ رہی

پاکستان لاہور(نمائندہ وائس آف جرمنی):صوبائی دارلحکومت میں 08 محرم الحرام کے روز سکیورٹی ہائی الرٹ رہی۔مجالس و جلوسوں کی سکیورٹی پر 05ہزار سے زائد پولیس افسران و اہلکار تعینات کئے گئے۔
یہ بات ترجمان لاہور پولیس نے آج یہاں جاری اپنے بیان میں کہی۔ترجمان نے بتایا کہ شہرمیں 08محرم الحرام کی مناسبت سے 425 مجالس اور87 عزاداری جلوس برآمد ہوئے۔ 08محرم الحرام کو منعقد ہونے والی مجالس میں اے کیٹگری کی43،بی کیٹگری کی 283 اور سی کیٹیگری کی 99مجالس شامل تھیں۔کیپٹل سٹی آفیسر لاہور بلال صدیق کمیانہ نے کہا کہ محرم الحرام کے پر امن انعقاد کیلئے شہر بھر میں سکیورٹی ہائی الرٹ ہے، سپروائزری افسران مجالس و جلوسوں کے روٹس پر سکیورٹی انتظامات کا خود جائزہ لے رہے ہیں۔انہوں نے کہا کہ محکمہ داخلہ کے جاری ایس او پیز پر من و عن عملدرآمد کروایا جارہا ہے۔سی سی پی او لاہور نے کہاکہ لاؤڈ سپیکر ایکٹ، مجالس و جلوسوں کے اوقات کار اور روٹ کی پابندی پر عملدرآمد یقینی بنایا جارہا ہے۔ٹریفک پولیس، ڈولفن، پیرو،اینٹی رائٹ فورس سمیت لاہور پولیس کے تمام ونگز اور رضا کار مجالس و جلوسوں کی سکیورٹی کیلئے مسلسل متحرک ہیں۔انہوں نے کہا کہ کنٹرول رومز اور سی سی ٹی وی کیمروں سے مجالس و جلوسوں کے سکیورٹی انتظامات کی لمحہ بہ لمحہ مانیٹرنگ کی جارہی ہے۔بلال صدیق کمیانہ نے مجالس اور جلوسوں کے راستوں پر ٹریفک کی روانی برقرار رکھنے کے لئے موثر اقدامات کی ہدایات جاری کرتے ہوئے کہا کہ ڈولفن اسکواڈ، پی آر یو اور ایلیٹ ٹیمیں مساجد، امام بارگاہوں اور مجالس سمیت اہم مقامات کے اطراف موثرپٹرولنگ یقینی بنائیں۔