صارفین بجلی کی شکایات کے فوری ازالے کے لئے لیسکوچیف ایگزیکٹو کی ای- کچہری

لاہور پاکستان(نمائندہ وائس آف جرمنی):‌ چیف ایگزیکٹو لیسکوشاہد حیدر نے آج ای کچہری میں فیس بک کے لائیو سیشن کے ذریعے صارفین کی شکایات سُنیں اور شکایات کے فی الفور ازالے کے لئے موقع پر ہی احکامات جاری کئے۔ لیسکو کی خصوصی ای کچہری میں ڈی جی امپلیمنٹیشن ضمیر حسین کلاچی،ایچ آر ڈائریکٹر آضیہ شعیب، کسٹمر سروسز ڈائریکٹر رائے محمد اصغر،چیف فنانشل آفیسربشریٰ عمران،چیف انجینئر او اینڈ ایم(ڈسٹری بیوشن) طاہر مئیو،کنسلٹنٹ پبلک ریلیشن افشاں مدثر اور ایڈیشنل ڈی جی کمپلینٹ سیل طاہر محمود بھی موجود تھے جبکہ لیسکو کے تمام سرکلز کے ایس ایز نے بھی شرکت کی۔لیسکو کی جانب سے منعقد کی جانے والی ای کچہری میں ریجن کے تمام سرکلز کے صارفین بھی اپنے مسائل کے بروقت حل کے لئے بھرپور شرکت کرتے ہیں۔آج منعقد ہونے والی لیسکو کی ای-کچہری میں مختلف نوعیت کی 195شکایات موصول ہوئیں جن میں زیادہ تر شکایات نئے میٹرز کی تنصیب اور خراب میٹروں کی تبدیلی میں تاخیر سے متعلق شکایات شامل ہیں۔چیف ایگزیکٹو لیسکو شاہد حیدر نے موصول شدہ شکایات پر متعلقہ افسران کو فی الفور ہدایات جاری کئیں۔ لیسکو چیف نے تمام افسران پر زور دیا کہ صارفین کی شکایات کے ازالے کو مکمل طور پر یقینی بنایا جائے۔لیسکو چیف نے صارفین سے بھی درخواست کی کہ بجلی کی بلا تعطل سپلائی کو یقینی بنانے کے لئے اپنے بجلی بلوں کی بروقت ادائیگی کریں۔واضح رہے کہ ہر ماہ لیسکو چیف اپنی ٹیم کے ہمراہ فیس بک پیج LESCO PMDU کے ذریعے عوام کی شکایات وصول کرتے ہیں جن کے فی الفور ازالے کو ہر ممکن طور پر یقینی بنایا جاتا ہے۔ ای کچہری کے دوران صارفین کا اپنے پیغامات میں کہنا تھا کہ لیسکو چیف کامیاب ای کچہری کے انعقاد پر مبارکباد کے مستحق ہیں جن کی وجہ سے صارفین کو اپنی شکایات کے بروقت ازالے کے لئے ایک ایسا فورم ستیاب ہے جہاں وہ باآسانی بناء دفاتر کے چکر لگائے اپنی شکایات کو درج کرواکر ریلیف حاصل کرسکتے ہیں۔