(سید عاطف ندیم-پاکستان): بلوچستان میں سیکیورٹی فورسز نے 17 اور 18 مئی 2025 کو دو الگ الگ کارروائیوں کے دوران بھارتی پراکسی تنظیم، نام نہاد بلوچ لبریشن فرنٹ (BLF) سے تعلق رکھنے والے تین اہم دہشت گردوں کو ہلاک کر دیا۔ کارروائیاں خفیہ اطلاعات کی بنیاد پر عمل میں لائی گئیں، جنہیں ملک دشمن عناصر کے خلاف ایک بڑی کامیابی قرار دیا جا رہا ہے۔
فوجی ذرائع کے مطابق پہلا آپریشن 17 مئی کی شب بلوچستان کے ضلع کیچ میں کیا گیا، جہاں دہشت گردوں کی موجودگی کی مصدقہ اطلاعات پر کارروائی کی گئی۔ سیکیورٹی فورسز نے علاقے کو گھیرے میں لے کر دہشت گردوں کے ایک خفیہ ٹھکانے پر ہلہ بولا، جس کے نتیجے میں فائرنگ کے تبادلے کے دوران دو دہشت گرد مارے گئے۔ یہ دہشت گرد صوبے میں تخریبی کارروائیوں، سیکیورٹی فورسز پر حملوں اور بھارتی انٹیلی جنس ایجنسیوں سے روابط میں ملوث تھے۔
دوسری کارروائی 18 مئی کو آواران کے علاقے میں عمل میں لائی گئی، جہاں ایک اور دہشت گرد کو ہدف بنایا گیا۔ ذرائع کے مطابق یہ دہشت گرد علاقے میں بدامنی پھیلانے، بھتہ خوری، اور معصوم شہریوں کو ہراساں کرنے کی سرگرمیوں میں سرگرم تھا۔ سیکیورٹی فورسز نے نہایت پیشہ وارانہ مہارت کا مظاہرہ کرتے ہوئے اسے ٹھکانے لگا دیا۔
کارروائیوں کے دوران دہشت گردوں کے قبضے سے اسلحہ، بارودی مواد، کمیونیکیشن ڈیوائسز اور بھارتی ساختہ اشیاء برآمد ہوئی ہیں، جو اس بات کا ثبوت ہیں کہ بلوچ لبریشن فرنٹ کو بیرونی حمایت حاصل ہے، خصوصاً بھارتی خفیہ ایجنسی را کی جانب سے۔
آئی ایس پی آر کے مطابق، ان کارروائیوں کا مقصد نہ صرف دہشت گرد نیٹ ورک کو کمزور کرنا ہے بلکہ بلوچستان میں امن و امان کو یقینی بنانا بھی ہے۔ بیان میں کہا گیا ہے کہ پاکستان کی سیکیورٹی فورسز ریاست دشمن عناصر کے خلاف کارروائیاں جاری رکھیں گی اور بلوچستان کے عوام کو دہشت گردی کے ناسور سے نجات دلانے کے لیے پرعزم ہیں۔
بلوچستان کے عوام نے سیکیورٹی فورسز کی بروقت اور مؤثر کارروائیوں کو سراہا ہے اور امید ظاہر کی ہے کہ ایسے آپریشنز کے نتیجے میں خطے میں پائیدار امن قائم ہوگا۔
