پی ڈی ایم نے عدلیہ اور فوج کو بدنام کرنے کی گھناؤنی مہم شروع کر رکھی ہے : فیاض الحسن چوہان

لاہور پاکستان(نمائندہ وائس آف جرمنی):‌ترجمان وزیر اعلیٰ پنجاب فیاض الحسن چوہان نے ن لیگ کی طرف سے عمران خان کے گھر کو سابق چیف جسٹس ثاقب نثار کا این آر او دینے کے الزام پر بیان دیتے ہوئے کہا کہ پی ڈی ایم کا سابق چیف جسٹس ثاقب پر عمران خان کے گھر کو این آر او دینے کا الزام حقیقت میں عدلیہ کو بدنام کرنے کی سازش ہے۔ عدلیہ کو اس الزام کا نوٹس لینا چاہیے اور جامع تحقیقات کروانی چاہئیں۔ انہوں نے کہا کہ پی ڈی ایم نے عدلیہ اور فوج کو بدنام کرنے کی گھناؤنی مہم شروع کر رکھی ہے۔جو کوئی انہیں ملک لوٹنے کی چھوٹ دے وہ ٹھیک باقی سب برے ہیں۔ملک کی بگڑی صورتحال کو سنبھالنے کی بجائے نا اہل لوگ اداروں کو بدنام کر رہے ہیں۔ فیاض الحسن چوہان نے کہا کہ معیشت کی یہ صورتحال ہے کہ ان کے پاس لوگوں کو تنخواہیں دینے کے پیسے نہیں ہیں۔ جو کوئی ان کے کالے کرتوتوں کی پوچھ گچھ کرے وہ برا بن جاتا ہے۔این آر اوز تو انہوں نے لئے ہیں جنھوں نے اربوں روپے ہڑپ کئے اور فرار ہو گئے۔ انکا مزید کہنا تھا کہ احتساب کو انتقام کا نام دے کر یہ لوگ فرار حاصل نہیں کر سکتے۔اصل طاقت عوام ہیں جو اب ان کا احتساب کریں گے۔