پاک فضائیہ کا سوڈان میں پھنسے پاکستانیوں کے انخلا کا آپریشن کامیابی سے جاری

کراچی پاکستان(نمائندہ وائس آف جرمنی):‌ پاک فضائیہ نے اپریل کے وسط سے مسلح تصادم کی وجہ سے تباہ حالی کے شکار سوڈان سے پاکستانیوں کے انخلاء کا تیسرا مشن کامیابی کے ساتھ مکمل کر لیا ہے۔ پاک فضائیہ کا سی-130 طیارہ سوڈان سے مزید 96 پھنسے ہوئے پاکستانیوں کو لے کر واپس کراچی پہنچ گیا ہے جس سے تنازعہ زدہ علاقے سے ایئرلفٹ کیے جانے والے ہم وطنوں کی تعداد 355 ہو گئی ہے۔ سربراہ پاک فضائیہ، ایئر چیف مارشل ظہیر احمد بابر سدھو کی ہدایت پر پی اے ایف کا ٹرانسپورٹ جہازوں کا بیڑہ مکمل پیشہ ورانہ مہارت اور اپنے پاکستانی بھائیوں اور بہنوں کو فوری طور پر بحفاظت پہنچانے کے عزم سے لبریز انخلاء کے مشنوں کو کامیابی سے انجام دے رہا ہے۔ پاک فضائیہ کے سوڈان سے پاکستانیوں کے انخلاء کے کامیاب مشنوں کو حکومت پاکستان اور عوام نے بےحد سراہا ہے۔