چیئرمین نیب کی پالیسی عوامی مقدمات کی جلد ازجلد تکمیل اور متاثرین کے نقصانات کا ازالہ ہے

پاکستان لاہور(نمائندہ وائسجرمنی):چیئرمین نیب کی پالیسی عوامی مقدمات کی جلد ازجلد تکمیل اور متاثرین کے نقصانات کا ازالہ ہے؛ نیب لاہور 7 ماہ کے دوران 9 ارب سے زائد رقم متاثرین میں تقسیم کر چکا: ڈی جی نیب لاہور کا کھلی کچہری میں متاثرین سے خطاب۔ قومی احتساب بیورو (نیب) لاہور کے ڈائریکٹر جنرل امجد مجید اولکھ نے چیئرمین نیب کی ہدایات کے مطابق نیب لاہور میں ماہانہ کھلی کچہری کا انعقاد کیا جس میں عوام الناس کومنافع کا لالچ دے کر رقوم بٹورنے والے ملزمان کے خلاف متاثرین اور ہائوسنگ سیکٹر کے متاثرین نے کثیر تعداد میں شرکت کی۔ متاثرین میں الحرم آٹو ٹریڈرز، Le-Villa-de Paris ، ٹویوٹا گوجرانوالہ موٹرز، رحمٰن گارڈن، سٹیٹ لائف کووآپریٹو ہائوسنگ سوسائٹی، ایلیٹ ٹائون ہائوسنگ سوسائٹی، پارک ویو ہائوسنگ سوسائٹی،پارم وسٹہ اور زیتون سٹی کے متاثرین نے دادرسی کیلئے شرکت کی۔تفصیلات کے مطابق ڈی جی نیب لاہور نے ماہانہ بنیاد پر منعقد ہونے والی کھلی کچہری میں متاثرین کو مخاطب کرتے ہوئے کہا کہ چیئرمین نیب لیفٹینٹ جنرل (ر) نذیر احمد کی واضع ہدایات ہیں کہ عوام سے متعلقہ کیسز کی تحقیقات برق رفتاری سےمکمل کی جائیں اور متاثرین کو ان کے نقصانات کا فوری ازالہ کروا یا جائے۔ کھلی کچہری میں شریک ہونے والے الحرم آٹو ٹریڈرز کے متاثرین نے کہا کہ ملزمان کی جانب سےگاڑیوں کی On money پر ماہانہ منافع دینے کے نام پر رقوم وصول کی گئیں تاہم بعد ازاں نہ منافع ادا کیا گیا اور نہ ہی متاثرین کی انویسٹمنٹ انہیں واپس لوٹائی گئی علاوہ ازیں الحرم آٹو ٹریڈرز کی انتظامیہ نے کچھ متاثرین کو آسان قسطوں پر گاڑیاں دینے کے نام پر بھی رقوم وصول کیں اور متاثرین کو خطیر سرمایہ سے محروم کیا۔Le-Villa-de Paris کے متاثرین کو مخاطب کرتے ہوئے ڈی جی نیب لاہور نے کہا کہ مذکورہ پراجیکٹ انتظامیہ کے خلاف تحقیقات مکمل کرکے رپورٹ نیب ہیڈ کوارٹرز ارسال کر دی گئی ہے ۔ انہوں نے مزید کہا کہ نیب کے علم میں آیا ہے کہ کچھ شکایت کنندگان انتظامیہ کے جھانسہ میں آ کر اپنی فائلیں سوسائٹی انتظامیہ کو سستے داموں واپس فروخت کر رہے ہیں یا سرٹیفکیٹ کے بدلہ کسی اور جگہ ایڈجسٹمنٹ کر رہے ہیں۔ نیب کی جانب سے متاثرین کواس حوالہ سے تاکیدکی گئی کہ سرٹیفکیٹ ایڈجسٹمنٹ کی صورت میں مذکورہ متاثرین کے کلیم نیب میں قابلِ قبول تصور نہ ہونگے اور ریکوری کی صورت میں ایسے متاثرین کے کلیم کینسل ہی تصور کئے جائینگے۔ انہوں نے مزید کہا کہ مذکورہ کیس میں نیب لاہور تفتیشی ٹیموں نے زیادہ سے زیادہ متاثرین کو سہولت فراہم کرنے کیلئے گوجرانوالہ کی حدود میں باقاعدہ کیمپ لگوائے تاکہ متاثرین اپنے کلیم نیب میں داخل کر سکیں۔
ٹویوٹا گوجرانوالہ موٹرز کے متاثرین کو مخاطب کرتے ہوئے ڈی جی نیب لاہور نے کہا کہ نیب کی جانب سے ٹویوٹا گوجرانوالہ موٹرز کے متاثرین کو آدھی سے زیادہ رقم واپس لوٹائی جا چکی ہے تاہم نیب نے انتظامیہ کی بیش قیمت جائیدادیں ضبط کر رکھی ہیں جن کی فروخت کے بعد متاثرین کو ان کی بقیہ رقوم کی ادائیگی مکمل ہوجائے گی جبکہ نیب متعلقہ پراپرٹیوں کی آکشن کے اقدامات کر رہا ہے۔الرحمٰن گارڈن کے متاثرین کو مخاطب کرتے ہوئے ڈی جی نیب لاہور نے کہا کہ سوسائٹی انتظامیہ کیخلاف نیب انکوائری برق رفتاری سے جاری ہے تاہم نیب لاہور کی جانب سے الرحمٰن گارڈن انتظامیہ کی پراپرٹیاں بھی منجمد کی جا چکی ہیں۔سٹیٹ لائف کووآپریٹو ہائوسنگ سوسائٹی کیخلاف شکایت کنندگان کو نئے طریقہ کار جس میں کم از کم 100 متاثرین یا 50 کروڑ مالیت کے کلیم ہونا شامل ہیں کے مطابق شکایات درج کروانے کی ہدایات دیتے ہوئے ڈی جی نیب لاہور نے کہا کہ مذکورہ سوسائٹی میں نیب لاہور اس سے قبل 15 کروڑ روپے کی ریکوری کروا کر متعلقہ حکام و متاثرین کو واپس لوٹا چکا ہے۔ سوسائٹی انتظامیہ کی مبینہ غفلت کے باعث سوسائٹی کا لے آئوٹ پلان تاحال لاہور ڈویلپمنٹ اتھارٹی سے منظور نہ ہوسکا۔پام وسٹہ ہائوسنگ پراجیکٹ سوسائٹی کے متاثرین کو مخاطب کرتے ہوئے ڈی جی نیب لاہور نے کہا کہ نیب قانون کے مطابق اپنے اقدامات اٹھا رہا ہے اور جلد ہی مذکورہ کیس میں مثبت پیش رفت ہو گی۔ علاوہ ازیں پارک ویو ہائوسنگ ، زیتون سٹی اور ایلیٹ ٹائون ہائوسنگ کے متاثرین کی شکایات پر بھی ڈی جی نیب لاہور نے مناسب ہدایات جاری کیں۔