پاکستان:‌ پنجاب پولیس کا نیو ایئر نائٹ پر ہوائی فائرنگ اور ون ویلنگ کرنے والوں کے خلاف شکنجہ تیار، سپیشل ٹیمیں تشکیل

(سید عاطف ندیم.پاکستان)انسپکٹر جنرل پولیس پنجاب ڈاکٹر عثمان انور کی ہدایت پر پنجاب پولیس نے نیو ایئر نائٹ پر ہوائی فائرنگ اور ون ویلنگ کرنے والوں کے خلاف شکنجہ تیار کر کے سپیشل ٹیمیں تشکیل دے دی ہیں۔آئی جی پنجاب نے نیو ایئر نائٹ پر ہوائی فائرنگ اور ون ویلنگ کرنے والوں کے خلاف سخت کارروائی کا حکم دیا ہے۔ رواں سال پنجاب پولیس کا فائرنگ اور ون ویلنگ کے خلاف سخت کریک ڈاون جاری رہا اور کریک ڈاؤن کے دوران سینکڑوں قانون شکن گرفتار کیے گئے۔
تفصیلات کے مطابق رواں سال لاہور سمیت صوبہ بھر میں ہوائی فائرنگ میں ملوث افراد کے خلاف 3595 مقدمات درج کر کے 5412 افراد کو گرفتار کیا گیا۔ 3865 ملزمان کو سزائیں دلوائی گئیں جبکہ 2816 مقدمات کا چالان مکمل کیا گیا۔ صوبائی دارالحکومت میں ہوائی فائرنگ میں ملوث افراد کے خلاف 523 مقدمات درج کر کے 572 افراد کو گرفتار کیا گیا۔ صوبہ بھر میں ون ویلنگ میں ملوث افراد کے خلاف 3170 مقدمات درج کر کے 3365 افراد کو گرفتارکیا گیا۔ لاہور میں ون ویلنگ میں ملوث افراد کے خلاف 1641 مقدمات درج کر کے 1569 افراد کو گرفتار کیا گیا۔
آئی جی پنجاب نے کہا کہ نیو ایئر نائٹ پر ہوائی فائرنگ اور ون ویلنگ کی ہرگز اجازت نہیں دی جائے گی۔ اسلحہ کی نمائش اور ہوائی فائرنگ میں ملوث ملزمان کسی رعایت کے مستحق نہیں ہیں۔ آر پی اوز اور ڈی پی اوز ناجائز اسلحہ کی خریدو فروخت کرنے والے افراد پر کڑی نظر رکھیں۔ آئی جی پنجاب نے کہا کہ والدین اپنے بچوں کو ون ویلنگ کی جان لیوا سرگرمی میں ہرگز ملوث نہ ہونے دیں