پاکستان پنجاب گورنمنٹ:‌ ہم تمہیں شرم دلا کر تھک چکے ہیں، تم جنگلی جانور ہو اور جانور ہی رہنا.عظمیٰ بخاری

(سید عاطف ندیم-پاکستان): وزیر اطلاعات پنجاب عظمی بخاری نے علی امین گنڈاپور کے بیان پر سخت ردعمل دیتے ہوئے کہا ہے کہ ہم تمہیں شرم دلا کر تھک چکے ہیں، تم جنگلی جانور ہو اور جانور ہی رہنا۔عظمیٰ بخاری نے وزیر اعلیٰ خیبرپختونخوا کے مریم نواز سے متعلق بیان پر ردعمل دیتے ہوئے کہا کہ تم ایک صوبے کے چیف ایگزیکٹو ہو کبھی تو انسانوں کی طرح گفتگو کر لیا کرو، جو منہ میں آتا ہے اپنے بدتمیز لیڈر کی طرح اول فول بک دیتے ہو۔
انہوں نے کہا کہ تمہاری فیملی کی خواتین شاید بغیر میک اپ اور جیولری کے بغیر ہی تقریبات میں شامل ہوتی ہیں، تمہاری فیملی کی خواتین پر ترس آتا ہے جو تم جیسے بے شرم اور بے لگام گھوڑے کو برداشت کر رہی ہیں۔عظمیٰ بخاری کا وزیر اعلیٰ کے پی پر سخت تنقید کرتے ہوئے کہنا تھا کہ علی امین پختونوں کی غیرت پر سیاہ دھبہ ہے، ہمیں لیکچر دیا جاتا ہے کہ پختون غیرت مند قوم ہے، بہن بیٹی کو عزت کی نظر سے دیکھتے ہیں لیکن علی امین پختون خواتین کیلئے بھی باعث شرمندگی اور ندامت کا عملی نمونہ ہے۔
وزیر اطلاعات پنجاب نے مزید کہا کہ جو لوگ مریم نواز سے کارکردگی میں مقابلہ نہیں کر سکتے وہ اپنی گندی زبان سے ان کا نام بھی مت لیں، آئندہ وزیر اعلیٰ پنجاب سے متعلق گھٹیا الفاظ استعمال کیے تو حلق سے زبان کھینچ لیں گے۔