پاکستان:اسلام آباد میں لگے گا جشن بہاراں کا رنگا رنگ اور منفرد میلہ، رینجرز کا دستہ مشعل پریڈ جبکہ اسلام آباد پولیس کا دستہ شمع پریڈ کا مظاہرہ کرے گا
خٹک، کیلاش اور کتھک سمیت روایتی رقص کے شوز پیش کیے جائیں گے، رینجرز کی کیمل پلٹون اور نیزہ بازی کی ٹیمیں بھی مظاہرہ کریں گی۔عوام کی تفریح کے لیے پہلی بار روایت سے ہٹ کر منفرد پروگرامز پیش کیے جائیں گے۔ محسن نقوی
(سید عاطف ندیم-پاکستان): وفاقی وزیر داخلہ محسن نقوی نے جشن بہاراں کے انتظامات کا جائزہ لیا۔ اسلام آباد کے شہری 25، 26 اور 27 فروری کو جشن بہاراں سے محظوظ ہو سکیں گے۔ جشن بہاراں میں پاکستان بھر کے روایتی اور مشہور کھانوں کے اسٹالز لگائے جائیں گے۔ رینجرز کا دستہ مشعل پریڈ جبکہ اسلام آباد پولیس کا دستہ شمع پریڈ کا مظاہرہ کرے گا، پاک فوج کے بینڈز بھی پرفارم کریں گے۔ جشن بہاراں کے دوران آتش بازی کا زبردست مظاہرہ ہوگا۔ جشن بہاراں میں خٹک، کیلاش اور کتھک سمیت روایتی رقص کے شوز پیش کیے جائیں گے، رینجرز کی کیمل پلٹون اور نیزہ بازی کی ٹیمیں بھی مظاہرہ کریں گی۔
محسن نقوی نے کہا کہ عوام کی تفریح کے لیے پہلی بار روایت سے ہٹ کر منفرد پروگرامز پیش کیے جائیں گے۔ انہوں نے مزید کہا کہ جشن بہاراں کا مقصد پاکستان کی ثقافت اور کلچر کو اجاگر کرنا ہے۔ سفارتی برادری کو بھی مدعو کیا جائے گا تاکہ وہ ہماری ثقافت سے روشناس ہو سکیں۔ پاکستان میں غیر ملکی کمپنیوں کے سی ای اوز کو بھی شرکت کی دعوت دی جائے گی۔ وفاقی وزیر داخلہ نے پولیس لائنز میں جشن بہاراں کے لیے شمع پریڈ کی ریہرسل کا معائنہ کیا۔ وزیر داخلہ محسن نقوی کی زیر صدارت جشن بہاراں کی تیاریوں سے متعلق اجلاس منعقد ہوا۔ اجلاس میں وفاقی سیکرٹری داخلہ، چیف کمشنر اسلام آباد، آئی جی اسلام آباد پولیس، ڈپٹی کمشنر اسلام آباد اور متعلقہ حکام موجود تھے۔
