اسلام آباد : ترجمان دفترخارجہ ممتاز زہرا بلوچ کا کہنا ہے کہ نگران وزیراعظم انوارالحق کاکڑ 18 سے 30 ستمبر تک امریکا کا دورہ کریں گے، جہاں وہ جنرل اسمبلی کے 78سیشن سے خطاب کریں گے۔
تفصیلات کے مطابق ترجمان دفترخارجہ ممتاز زہرا بلوچ نے ہفتہ وار میڈیا بریفنگ دیتے ہوئے کہا کہ نگران وزیراعظم انوارالحق کاکڑ 18سے 30 ستمبر تک امریکا کا دورہ کریں گے، نگران وزیر خارجہ بھی وزیراعظم کے ہمراہ ہوں گے۔
ترجمان دفترخارجہ کا کہنا تھا کہ وزیر عظم 22 ستمبر کو اقوام متحدہ جنرل اسمبلی کے 78سیشن سے خطاب کریں گے اور ساتھ ہی اقوام متحدہ اجلاس کےسائیڈ لائن پر سربراہان مملکت سے ملاقاتیں کریں گے۔
ممتاز زہرا بلوچ نے کہا کہ وزیراعظم دیرپا ترقی کے حوالے سے عالمی کانگریس سے بھی خطاب کریں گے اور دورے کے دوران انٹرنیشنل میڈیا سے بھی بات چیت کریں گے۔
ترجمان نے مزید بتایا کہ وزیر خارجہ برطانیہ میں دولت مشترکہ کی یوتھ میٹنگ اجلاس میں شرکت کررہے ہیں ، وزیر خارجہ نے پسماندہ طبقات کے نوجوانوں کو آگے لانے کے اقدامات سے آگاہ کیا اور دولت مشترکہ سیکرٹری جنرل ، برطانوی وزرا ودیگر ممالک کےوزرا سے ملاقاتیں کیں۔
کشمیر میں افسران کے قتل کے واقعہ پر ان کا کہنا تھا کہ مقبوضہ کشمیر میں بھارتی قانون نافذ کرنے والے افسران کے قتل کے واقعہ کو دیکھ رہے ہیں ، ہم بھارتی دعوں کی تصدیق کے آزادانہ تحقیقات کے عمل کو دیکھ رہے ہیں، بھارت ماضی میں بھی اپنے اندرونی مسائل پاکستان کا نام استعمال کرتا رہا ہے۔
