پاکستان سمیت کئی ممالک میں عید الفطر: فلسطین اور کشمیر سے اظہار یکجہتی

(سید عاطف ندیم-پاکستان):‌چیئرمین مرکزی رویت ہلال کمیٹی مولانا عبدالخبیر آزاد کے شوال المکرم 1446 ہجری کا چاند نظر آنے کے اعلان کے بعد ملک بھر میں آج بروز پیر عیدالفطر منائی جا رہی ہے۔
پاکستان کے دارالحکومت اسلام آباد میں فیصل مسجد اور لاہور کی بادشاہی مسجد سمیت ملک کی دیگر مساجد میں نماز عید الفطر کے اجتماعات ہوئے۔
پشاور، کوئٹہ، ملتان، حیدرآباد، سکھر، مردان، سبی، مری، گلگت، سرگودھا، بہاولپور، جھنگ سمیت دیگر بڑے شہروں میں بھی عید الفطر کی نماز کے اجتماعات ہوئے جس میں لاکھوں افراد نے شرکت کی۔
عیدالفطر کے موقع پر پاکستان کے وزیر اعظم شہباز شریف نے قوم کے نام اپنے پیغام میں مبارک باد دیتے ہوئے کہا کہ ’ملک کی سالمیت اور استحکام کے لیے ہمیں متحد ہونا ہوگا اور کسی بھی سازش کو کامیاب نہیں ہونے دینا۔‘
شہباز شریف نے کہا ہے کہ ’پاکستان کو اندرونی اور بیرونی دشمنوں سے خطرات لاحق ہیں۔ ہمیں ہر قسم کی انتہا پسندی، نفرت اور فرقہ واریت سے بچنا ہوگا۔‘ پاکستانی وزیر اعظم کا مزید کہنا تھا کہ ’معیشت، معاشرت اور قومی یکجہتی کو مستحکم کرنا ہم سب کی مشترکہ ذمہ داری ہے۔
’حکومت پاکستان اس وقت ملک کی اقتصادی بحالی، امن و امان کے قیام اور سماجی استحکام کے لیے بھرپور کوششیں کر رہی ہے۔ ہمیں چاہیے کہ ہم متحد ہو کر اپنے ملک کو ترقی اور خوشحالی کی راہ پر گامزن کریں۔‘
شہباز شریف نے عید کے موقع پر فلسطین اور کشمیر کے عوام سے بھی اظہار یکجہتی کیا اور کہا کہ ’ہمیں اپنے ان مظلوم بہن، بھائیوں کو بھی یاد رکھنا چاہیے جو ظلم و بربریت کا شکار ہیں، خاص طور پر فلسطین اور انڈیا کے زیر تسلط مقبوضہ جموں و کشمیر کے مظلوم عوام جو آزادی کی جدوجہد میں مصروف ہیں۔‘
وزیر اعظم شہباز شریف نے کہا کہ ’پاکستان ہمیشہ ان کے ساتھ کھڑا ہے اور رہے گا۔ عالمی برادری کو چاہیے کہ وہ انسانی حقوق کی خلاف ورزیوں کو روکے اور ان بے گناہ مسلمانوں کی داد رسی کرے۔‘
قبل ازیں شوال کا چاند دیکھنے کے لیے مرکزی رویت ہلال کمیٹی کا اجلاس مولانا عبدالخبیر آزاد کے زیر صدارت اسلام آباد میں منعقد ہوا جس میں مذہبی امور اور موسمیات کی وزارتوں کے حکام شریک تھے۔
اجلاس کے بعد مولانا عبدالخبیر نے پریس کانفرنس کرتے ہوئے کہا کہ ملک کے بیشتر مقامات پر اتوار کی شام مطلع صاف رہا، کئی جگہوں سے چاند نظر آنے کی شہادتیں موصول ہوئیں جن میں لاہور، قصور، شیخوپورہ اور گوجرانوالہ شامل ہیں، لہٰذا ملک بھر میں عیدالفطر آج بروز پیر 31 مارچ کو منائی جائے گی۔
اجلاس کے بعد چیئرمین مرکزی رویت ہلال کمیٹی مولانا عبدالخبیر آزاد نے ملکی ترقی و استحکام اور ملک سے دہشت گردی اور انتہا پسندی کے خاتمے کی دعا کی۔
وفاقی حکومت نے پیر 31 مارچ سے بدھ دو اپریل تک عیدالفطر کی چھٹیوں کا اعلان کر رکھا ہے۔
ادھر سعودی عرب، متحدہ عرب امارات (یو اے ای)، قطر، کویت، بحرین، یمن، فلسطین، افغانستان، برطانیہ سمیت متعدد یورپی ممالک میں مسلمانوں نے اتوار کے روز عید الفطر منائی۔
مکہ مکرمہ میں المسجدالحرام اور مدینہ منورہ میں مسجد نبویﷺ میں عید الفطر کی نماز کی ادائی کے اجتماع میں ہزاروں مقامی اور غیر ملکی زائرین نماز عید کے اجتماعات میں شریک ہوئے۔