آئرلینڈ، سکاٹ لینڈ اور ویسٹ انڈیز کے بعد پاکستان نے لاہور کے قذافی سٹیڈیم میں تھائی لینڈ کو 87 رنز سے شکست دی۔ اس طرح ورلڈ کپ کی دو خالی جگہوں میں سے ایک جگہ پاکستان کو مل گئی۔

چار میں سے تین میں کامیابی حاصل کرنے والی بنگلہ دیش کی ٹیم ہفتہ کو پاکستان کے خلاف کھیلے گی جبکہ ویسٹ انڈیز کا اس مرحلے کا آخری مقابلہ تھائی لینڈ سے ہو گا۔ سکاٹ لینڈ اپنے آخری میچ میں آج جمعے کو آئرلینڈ سے مدِ مقابل ہے۔

پاکستان کی کپتان فاطمہ ثناء نے ہراول کا کردار ادا کیا اور چار میچوں میں 10 وکٹیں حاصل کیں۔ وہ کوالیفائنگ ٹورنامنٹ میں بولنگ چارٹ پر ویسٹ انڈیز کی ہیلی میتھیوز کے بعد دوسرے نمبر پر ہیں جن کی چار میچوں میں 12 وکٹیں ہیں۔

ثناء نے تھائی لینڈ کے خلاف اپنی شاندار آل راؤنڈ کارکردگی کے ساتھ ورلڈ کپ میں پاکستان کو جگہ دلوائی۔ انہوں نے نصف سنچری سکور کی اور پھر اپنی میڈیم فاسٹ بولنگ سے 39 رنز کے عوض تین وکٹیں بھی حاصل کیں۔

انٹرنیشنل کرکٹ کونسل (آئی سی سی) نے تاحال ویمنز ورلڈ کپ کی تاریخوں اور مقامات کا اعلان نہیں کیا تاہم گذشتہ دسمبر میں بھارت اور پاکستان کے درمیان شدید سیاسی کشیدگی کے باعث ہائبرڈ ماڈل پر اتفاق کیا گیا تھا۔ آئی سی سی ایونٹ میں اگر بھارت اور پاکستان میزبان ہوں تو وہ ایک دوسرے کے ملک کا دورہ کرنے کی بجائے اپنے تمام میچز نیوٹرل مقام پر کھیلیں گے۔