واٹس ایپ کن ڈیوائسز پر نہیں چلے گا!

(سید عاطف ندیم-پاکستان):دنیا کی مقبول ترین میسجنگ ایپلیکیشن واٹس ایپ، جس کے 3 ارب سے زائد صارفین ہیں اور اب یہ ایپ کچھ پرانے آئی فون ماڈلز پر دستیاب نہیں ہوگی۔
میٹا کی ملکیت والے اس پلیٹ فارم نے تین آئی فون ماڈلز کے لیے سپورٹ ختم کر دی ہے۔
واٹس ایپ اب صرف ان آئی فون ڈیوائسز پر چلے گا جن میں آئی او ایس 15.1 یا اس سے نیا ورژن انسٹال ہو۔ فی الحال، آئی او ایس 12 یا اس سے جدید ورژن چلانے والے آئی فون صارفین واٹس ایپ استعمال کر سکتے ہیں، لیکن جب میٹا اپنا اگلا بڑا اپڈیٹ جاری کرے گا، تو یہ شرط تبدیل ہو جائے گی۔
متاثرہ ماڈلز میں آئی فون 5 ایس، آئی فون 6، اور آئی فون 6 پلس شامل ہیں۔ اگرچہ ان فونز کے صارفین کی تعداد کم ہے، لیکن یہ فیصلہ پرانے ڈیوائسز استعمال کرنے والوں کے لیے پریشانی کا سبب بن سکتا ہے۔
واٹس ایپ کے ترجمان کے مطابق، کم استعمال ہونے والے اور پرانے آپریٹنگ سسٹمز کو سپورٹ کرنا مشکل ہوتا ہے، کیونکہ ان میں نئی سیکیورٹی اپڈیٹس یا ضروری فیچرز کی کمی ہوتی ہے۔ واضح رہے کہ ایپل نے بھی یہ ماڈلز کئی سال پہلے متروک قرار دے دیے تھے۔
اپنے فون کا آئی او ایس ورژن کیسے چیک کریں؟
1. سیٹنگز ایپ کھولیں۔
2. *جنرل پر ٹیپ کریں۔
3. About (معلومات) کے ٹیب پر جائیں۔
4. ورژن کے تحت آپ کا موجودہ آئی او ایس نمبر دکھائی دے گا۔
اگر آپ کو اپڈیٹ کرنے کی ضرورت ہو، تو جنرل > سافٹ ویئر اپڈیٹ پر جا کر نیا ورژن انسٹال کریں۔
اس کے علاوہ، اسپاٹیفائی اور انسٹاگرام جیسی ایپس بھی ان پرانے ماڈلز پر دستیاب نہیں ہیں۔ میٹا کا کہنا ہے کہ وہ وقتاً فوقتاً سپورٹڈ آپریٹنگ سسٹمز کا جائزہ لیتے رہتے ہیں۔
میٹا اے آئی کے خلاف صارفین کی شکایات
دوسری جانب، واٹس ایپ میں متعارف ہونے والے میٹا اے آئی فیچر نے بھی کچھ صارفین کو ناراض کیا ہے۔ برطانیہ کے کچھ صارفین نے اسے غیرضروری قرار دیتے ہوئے اسے ہٹانے کا مطالبہ کیا ہے۔
ایک صارف نے لکھا کہ”میں میٹا اے آئی کو کیسے بند کروں؟ یہ بٹن مسلسل نظر آ رہا ہے اور میں اسے استعمال نہیں کرنا چاہتا!”