کراچی میں معروف اداکارہ حمیرا اصغر مردہ حالت میں فلیٹ سے برآمد، پوسٹ مارٹم رپورٹ جاری، موت کی وجہ تاحال نامعلوم

کراچی، نامہ مگار:
شوبز انڈسٹری سے تعلق رکھنے والی معروف اداکارہ حمیرا اصغر کی لاش کراچی کے ڈیفنس علاقے میں واقع ان کے فلیٹ سے برآمد ہوئی ہے۔ ابتدائی پوسٹ مارٹم رپورٹ جاری کر دی گئی ہے تاہم ان کی موت کی حتمی وجہ تاحال سامنے نہیں آ سکی۔ پولیس اور فرانزک ماہرین واقعے کی مکمل تحقیقات میں مصروف ہیں۔

پولیس سرجن ڈاکٹر سمعیہ کے مطابق اداکارہ کی لاش انتہائی حد تک گل سڑ چکی تھی، جو اس بات کی نشاندہی کرتی ہے کہ موت تقریباً ایک ماہ قبل واقع ہوئی۔ انہوں نے بتایا کہ لاش سے حاصل کردہ ڈی این اے اور کیمیکل تجزیے کے نمونے لیبارٹری بھیج دیے گئے ہیں اور مکمل رپورٹ کا انتظار کیا جا رہا ہے۔

لاش کی شناخت اور حالاتِ واقعہ

ایس ایس پی ساؤتھ مہظور علی کے مطابق، اداکارہ کے فلیٹ کا دروازہ عدالتی حکم پر بیلف اور پولیس اہلکاروں نے منگل کی شام اس وقت توڑا جب فلیٹ مالک نے کرایہ ادا نہ کرنے پر قانونی کارروائی کی۔ فلیٹ کے اندر ایک ناقابلِ شناخت لاش موجود تھی، جس کی شناخت ممکن نہ ہو سکی۔

پولیس کے مطابق، لاش جس حالت میں ملی ہے اس سے فوری طور پر شناخت ممکن نہیں۔ ڈی این اے ٹیسٹ کے ذریعے ہی حتمی شناخت کی جا سکے گی۔ اب تک کوئی قریبی عزیز یا رشتہ دار بھی سامنے نہیں آیا ہے۔ تاہم پولیس کو شبہ ہے کہ یہ لاش اداکارہ حمیرا اصغر کی ہے، جن کا تعلق لاہور سے تھا اور وہ گزشتہ سات برس سے مذکورہ فلیٹ میں تنہا مقیم تھیں۔

سوشل میڈیا پر افواہیں اور عوامی ردعمل

حمیرا اصغر نے 2022 میں اے آر وائی ڈیجیٹل کے مقبول ریئلٹی شو ’تماشا گھر‘ میں شرکت کی تھی، جس سے انہیں شہرت حاصل ہوئی۔ ان کی اچانک موت پر سوشل میڈیا پر مداحوں نے افسوس کا اظہار کیا ہے جبکہ شوبز حلقوں میں بھی غم کی لہر دوڑ گئی ہے۔

پولیس کا کہنا ہے کہ سوشل میڈیا پر موجود تصاویر سے لاش کی شناخت کرنا ممکن نہیں، کیونکہ لاش کی حالت ناقابلِ شناخت ہو چکی ہے۔

پولیس اور فرانزک ٹیم کی کارروائی

واقعے کے بعد فلیٹ کو سیل کر دیا گیا ہے اور فرانزک ٹیم نے موقع سے شواہد اکٹھے کیے ہیں۔ پولیس کا کہنا ہے کہ پوسٹ مارٹم رپورٹ اور ڈی این اے تجزیے کی بنیاد پر تحقیقات کا دائرہ وسیع کیا جائے گا۔

ایس ایس پی مہظور علی نے بتایا:

"واقعہ افسوسناک ہے، لیکن لاش کی حالت ایسی تھی کہ فوری طور پر نہ تو موت کی وجہ معلوم ہو سکی اور نہ ہی شناخت کی تصدیق ہو سکی۔”

حتمی نتیجے کے منتظر

حمیرا اصغر کی موت سے متعلق حتمی معلومات ڈی این اے رپورٹ اور کیمیکل تجزیے کے نتائج آنے کے بعد سامنے آئیں گی۔ پولیس کے مطابق، موت طبعی تھی یا واقعہ میں کوئی مجرمانہ پہلو شامل ہے، یہ کہنا ابھی قبل از وقت ہوگا۔

اداکارہ کی تنہائی میں زندگی، عدم تعلقات اور دیرینہ گوشہ نشینی نے اس واقعے کو مزید پراسرار بنا دیا ہے۔

پولیس اور فرانزک ادارے رپورٹس مکمل ہونے کے بعد میڈیا کو مزید بریف کریں گے۔