وزیراعلیٰ پنجاب مریم نوازشریف کا تاریخی اقدام — پاکستان کی پہلی باقاعدہ رائٹ مینجمنٹ پولیس فورس کا قیام، فاروق آباد میں تربیت مکمل

سید عاطف ندیم-پاکستان

وزیراعلیٰ پنجاب مریم نوازشریف نے امن و امان کے قیام اور عوامی و سرکاری املاک کے تحفظ کے لیے ایک انقلابی قدم اٹھاتے ہوئے پاکستان کی پہلی باقاعدہ رائٹ مینجمنٹ پولیس فورس قائم کر دی ہے۔ اس خصوصی فورس کا مقصد صوبے میں ہجوم، دھرنوں، احتجاجات اور مظاہروں کے دوران امن و قانون کو برقرار رکھتے ہوئے انسانی جانوں، کاروبار، عوامی سہولیات اور قومی املاک کو نقصان سے بچانا ہے۔

فاروق آباد ٹریننگ سنٹر میں پاسنگ آؤٹ پریڈ، 3 ہزار اہلکاروں کی تربیت مکمل

وزیراعلیٰ پنجاب کی ہدایت پر رائٹ مینجمنٹ پولیس فورس کے پہلے بیچ کی تربیت فاروق آباد پولیس ٹریننگ سنٹر میں مکمل کی گئی۔ ابتدائی طور پر یہ فورس 5 ہزار اہلکاروں پر مشتمل ہوگی، جن میں سے پہلے 3 ہزار اہلکاروں نے کامیابی سے 8 ہفتے کی خصوصی تربیت مکمل کر لی ہے۔ اس موقع پر فاروق آباد میں شاندار پاسنگ آؤٹ پریڈ کا انعقاد کیا گیا، جس میں اہلکاروں نے تربیت کے دوران حاصل کی گئی مہارتوں کا عملی مظاہرہ پیش کیا۔

پریڈ میں ایڈیشنل آئی جی خرم شکور، ڈی آئی جی رائٹ مینجمنٹ اسد سرفراز اور دیگر اعلیٰ افسران نے شرکت کی، جبکہ بہترین کارکردگی پر انسپکٹر حافظ خرم شہزاد، سب انسپکٹر شان علی، اسسٹنٹ سب انسپکٹر سجاد ریاض، شہزاد حسین اور ہیڈ کانسٹیبل نعیم نیاز کو خصوصی انعامات سے نوازا گیا۔

پیشہ ورانہ تربیت، عالمی معیار کی ٹیکنیک، جدید سازوسامان

رائٹ مینجمنٹ پولیس کو امریکہ، ترکی، یورپ اور دیگر ترقی یافتہ ممالک کے رائٹ مینجمنٹ ماڈلز اور ٹریننگ مینولز کے مطابق تربیت دی گئی ہے۔ ترک ماہرین کی خصوصی نگرانی میں ان اہلکاروں کو ہجوم کو منتشر کرنے، خطرناک حالات کو پرامن انداز میں قابو پانے، اور فسادی عناصر سے نمٹنے کی جدید مہارتیں سکھائی گئیں۔

پولیس اہلکاروں کو جدید آلات اور سازوسامان سے لیس کیا گیا ہے جن میں:

• کراؤڈ انگیجمنٹ ٹیم

• فرسٹ ایڈ ٹیم

• ڈرون ٹیم

• مذاکراتی ٹیم

• کراؤڈ کنٹرول یونٹ

• کے نائن یونٹ (سنیفر ڈاگز)

• سنائپر سپورٹ یونٹ

• گرفتاری اور انخلا ٹیمیں

شہر کے ہر ریجن میں 250 اہلکار تعینات کیے جائیں گے، جبکہ ہر ٹیم کو 15 سب ٹیموں میں تقسیم کیا گیا ہے تاکہ موقع پر تیز ترین اور منظم ردعمل ممکن بنایا جا سکے۔

رائٹ مینجمنٹ فورس کا کردار اور اہمیت

رائٹ مینجمنٹ فورس کا بنیادی ہدف احتجاج، دھرنوں، جتھوں، یا مشتعل ہجوم کو قانون کے دائرے میں رہتے ہوئے منتشر کرنا، عوامی جان و مال کو محفوظ رکھنا اور ریاستی املاک کو نقصان سے بچانا ہے۔ وزیراعلیٰ نے اپنے پیغام میں کہا:

"عوام کے جان و مال کا تحفظ میری اولین ترجیح ہے۔ رائٹ مینجمنٹ پولیس فورس کا قیام ایک مثبت اور بروقت قدم ہے۔ مشتعل ہجوم کو بحفاظت قابو میں رکھنا ضروری ہے تاکہ صورتحال مزید خراب ہونے سے بچائی جا سکے۔”

انہوں نے کہا کہ ماضی میں متعدد بار ریاستی اور نجی املاک کو منظم منصوبہ بندی کے تحت نقصان پہنچایا گیا، جس سے نہ صرف عوامی مفاد متاثر ہوا بلکہ پاکستان کا عالمی تشخص بھی مجروح ہوا۔ رائٹ مینجمنٹ فورس ان چیلنجز کا پیشہ ورانہ انداز میں مقابلہ کرے گی۔

پیشہ ورانہ الاؤنس اور سہولیات

اس فورس میں شامل اہلکاروں کو ان کی اضافی ذمہ داریوں اور خطرناک نوعیت کے فرائض کے پیش نظر خصوصی الاؤنس بھی دیا جائے گا۔ حکومت نے اعلان کیا ہے کہ مستقبل میں فورس کی توسیع بھی کی جائے گی تاکہ صوبے کے ہر ضلع میں فوری رسپانس کے لیے اہلکار دستیاب ہوں۔

وزیراعلیٰ مریم نوازشریف کا یہ اقدام صرف امن و امان کے قیام تک محدود نہیں، بلکہ یہ پنجاب کو ایک جدید اور محفوظ صوبہ بنانے کی پالیسی کا حصہ ہے۔ پہلی بار ایک منظم، تربیت یافتہ، اور پیشہ ورانہ فورس کو احتجاج اور مظاہروں کے دوران استعمال کرنے کا منصوبہ بنایا گیا ہے، جس سے پرامن احتجاج کا حق بھی برقرار رہے گا اور تخریبی عناصر کی حوصلہ شکنی بھی ہوگی۔