خوشاب (نمائندہ خصوصی):وطن کی حفاظت کے لیے اپنی جان کا نذرانہ پیش کرنے والے عظیم سپاہی، تصور اقبال شہید کی پانچویں برسی آج پورے ملک میں عقیدت و احترام کے ساتھ منائی گئی۔ ضلع خوشاب سے تعلق رکھنے والے اس جوان نے 20 جولائی 2020ء کو خیبر پختونخوا کے قبائلی علاقے میں جاری آپریشن "المیزان” کے دوران دہشتگردوں سے لڑتے ہوئے جامِ شہادت نوش کیا تھا۔
شہید تصور اقبال نے اپنی قیمتی جان وطن کی حرمت، امن و سلامتی اور دشمن کی سازشوں کو ناکام بنانے کے لیے قربان کر دی۔ اُن کی جرأت، استقامت اور حب الوطنی کی مثال آج بھی قوم کے لیے فخر اور نئی نسل کے لیے مشعلِ راہ ہے۔ دشمن کے سامنے آخری لمحے تک ڈٹے رہنا اور مادرِ وطن پر قربان ہو جانا، اس بات کا منہ بولتا ثبوت ہے کہ پاک فوج کے جوانوں کی پہچان قربانی، وفاداری اور غیرمتزلزل جذبہ ایمانی ہے۔
شہید کی برسی کے موقع پر ان کے آبائی گاؤں میں ایک خصوصی تقریب کا انعقاد کیا گیا، جس میں عسکری و سول حکام، شہید کے اہل خانہ، مقامی افراد، طلباء اور دیگر معززین نے شرکت کی۔ تقریب کے دوران شہید کی قبر پر پھول چڑھائے گئے، فاتحہ خوانی کی گئی اور قومی ترانے کے ساتھ شہید کو سلامی دی گئی۔
تقریب سے خطاب کرتے ہوئے فوجی افسران اور دیگر مقررین نے کہا کہ سپاہی تصور اقبال شہید جیسے بہادر جوانوں کی قربانیاں ملک کے امن و استحکام کی ضمانت ہیں۔ اُن کا کہنا تھا کہ شہداء کی قربانیاں کبھی رائیگاں نہیں جاتیں اور ان کی یاد ہمیشہ زندہ رکھی جائے گی۔ سپاہی تصور اقبال شہید نے دشمن کی گولیاں کھا کر ہمیں امن کی فضا دی، اور اُن کی بہادری ہر پاکستانی کے دل میں بسا ہوا فخر ہے۔
شہید کے والد نے اس موقع پر گفتگو کرتے ہوئے کہا کہ ’’میرے بیٹے نے وطن کے لیے جان دی، یہ میرے لیے سب سے بڑا اعزاز ہے۔ میں سرخرو ہوں کہ میرے لختِ جگر نے ملک پر اپنی جان قربان کی۔‘‘ اُنہوں نے کہا کہ ان کے بیٹے کی قربانی پوری قوم کی حفاظت کی علامت ہے اور وہ آج بھی فخر محسوس کرتے ہیں۔
شہید کے اسکول کے اساتذہ اور ساتھی طلباء نے بھی شہید کی یادوں کو تازہ کرتے ہوئے اُن کے جذبہ حب الوطنی، فرض شناسی اور اعلیٰ کردار کو سراہا۔ ایک استاد نے کہا کہ ’’تصور ایک خاموش طبع، لیکن جذبے سے بھرپور طالبعلم تھا، جسے بچپن ہی سے وطن سے محبت کا جنون تھا۔‘‘
پاک فوج کے ترجمان ادارے آئی ایس پی آر کی جانب سے بھی شہید کو خراجِ عقیدت پیش کیا گیا۔ ایک بیان میں کہا گیا کہ ’’سپاہی تصور اقبال شہید اور اُن جیسے دیگر شہداء ہمارے حقیقی ہیرو ہیں، جن کی قربانیوں کے باعث پاکستان آج ایک مضبوط اور باوقار ملک کے طور پر کھڑا ہے۔ ہم ان کی قربانیوں کو کبھی فراموش نہیں کریں گے۔‘‘
قوم آج کے دن سپاہی تصور اقبال شہید کے جذبۂ قربانی، جرأت اور حب الوطنی کو سلام پیش کرتی ہے۔ اُن کی شہادت یہ پیغام دیتی ہے کہ وطن کی حرمت، سلامتی اور خودمختاری کے لیے کسی قربانی سے دریغ نہیں کرنا چاہیے۔ ایسے عظیم سپوت ہی پاکستان کی اصل طاقت ہیں، جن کی بدولت آج ہم آزاد فضا میں سانس لے رہے ہیں۔
