وزیراعلیٰ پنجاب سے امریکی قونصل جنرل کی ملاقات،تجارتی تعلقات سمیت اہم امور پر تبادلہ خیال

نیوز ڈیسک لاہور:وزیراعلیٰ پنجاب مریم نواز شریف سے لاہور میں تعینات ہونے والے امریکہ کے نئے قونصل جنرل اسٹیٹسن سینڈرز نے ملاقات کی۔ ملاقات میں باہمی دلچسپی کے امور، تجارتی تعلقات، توانائی تعاون، ٹیکنالوجی، زراعت اور تعلیمی تبادلوں پر تفصیلی تبادلہ خیال کیا گیا۔
وزیراعلیٰ مریم نواز شریف نے قونصل جنرل اسٹیٹسن سینڈرز کو لاہور آمد پر خوش آمدید کہا اور ان کے منصب سنبھالنے پر دلی مبارکباد پیش کی۔ انہوں نے اس بات کو سراہا کہ سینڈرز کی تعیناتی ایسے وقت میں ہوئی ہے جب پاکستان اور امریکہ کے درمیان تعلقات میں مثبت پیش رفت دیکھنے کو مل رہی ہے۔
وزیراعلیٰ نے اس موقع پر کہا کہ پاکستان اور امریکہ کے تعلقات کئی دہائیوں پر محیط ایک قابلِ اعتماد، مستحکم اور دور رس شراکت داری کی بنیاد پر قائم ہیں، جنہیں عوامی روابط، تجارتی تعاون اور مشترکہ مفادات نے مزید تقویت بخشی ہے۔
مریم نواز نے 2024 میں دونوں ممالک کے درمیان تجارتی حجم میں اضافے کو خوش آئند قرار دیتے ہوئے کہا کہ امریکہ پاکستان کا سب سے بڑا تجارتی شراکت دار اور قابلِ اعتماد اقتصادی پارٹنر ہے۔ انہوں نے کہا کہ پاکستانی نژاد امریکی برادری دونوں ملکوں کے درمیان عوامی رابطے کا ایک مضبوط پل ہے۔
وزیراعلیٰ پنجاب نے یاد دہانی کروائی کہ وہ اپریل 2025 میں امریکی کانگریشنل پاکستان کاکس سے ملاقات بھی کر چکی ہیں، جو پاک امریکہ تعلقات کو ایک نئی جہت دینے کی کوششوں کا حصہ ہے۔
مریم نواز نے پنجاب میں ترقیاتی منصوبوں کا ذکر کرتے ہوئے کہا کہ یہاں ہر سال 20 ہزار سے زائد آئی ٹی گریجویٹس فارغ التحصیل ہو رہے ہیں، جو جدید ٹیکنالوجی پر مبنی معیشت میں اہم کردار ادا کر سکتے ہیں۔ انہوں نے کہا کہ پنجاب پاکستان کی زرعی ریڑھ کی ہڈی ہے، اور حکومت واٹر ایفیشنٹ فارمنگ، پریسیژن ایگریکلچر، اور کولڈ چین انفرااسٹرکچر کی ترقی کو ترجیح دے رہی ہے۔
انہوں نے امریکی زرعی ٹیکنالوجی کمپنیوں کو دعوت دی کہ وہ پنجاب میں سرمایہ کاری کے بے شمار مواقع سے فائدہ اٹھائیں۔
وزیراعلیٰ پنجاب نے بتایا کہ صوبے میں جدید ترین ٹیکنالوجی سے لیس نئی الیکٹرک ٹرین متعارف کرائی جا رہی ہے، جبکہ "اپنی چھت اپنا گھر” منصوبے کے تحت پبلک سیکٹر ہاؤسنگ میں قلیل عرصے میں قابل تقلید مثال قائم کی گئی ہے۔
آخر میں مریم نواز نے کہا کہ پاکستان اور امریکہ کے تعلقات ایک آزمودہ، بااعتماد اور پائیدار شراکت داری کی مثال ہیں، اور ہم ان تعلقات کو ایک جامع، اسٹریٹجک اور عوامی مفاد پر مبنی پارٹنرشپ میں تبدیل کرنے کے لیے پُرعزم ہیں-