غزہ میں موسم سرما کی پہلی بارش، سینکڑوں خیمے ڈوب گئے

وقفے وقفے سے ہونے والی موسلا دھار بارش نے وہ معمولی سامان بھی بھگو دیا، جو یہاں مقیم خاندان غزہ کے دوسرے علاقوں سے اپنی جانوں کے ہمراہ بچا کر ساتھ لا سکے تھے۔ تیز ہوائیں خیموں کو اکھاڑ دینے کے ساتھ ساتھ مشکل سے جمع کیے گئے کھانے پینے کے ذخائر برباد کر رہی ہیں۔
اقوام متحدہ کے مطابق اسرائیلی فوج کی جانب سے انسانی ہمدردی کا زون قرار دیا گیا المواصی گزشتہ گرمیوں سے تقریباً 4 لاکھ 25 ہزار بے گھر فلسطینیوں کا مرکز بن چکا ہے ، جن کی اکثریت عارضی خیموں میں رہنے پر مجبور ہے۔ مزید بارش کے خدشے کے ساتھ کئی لوگ تباہ شدہ عمارتوں میں پناہ لینے لگے ہیں، چاہے وہ منہدم ہونے کے قریب ہی کیوں نہ ہوں اور ان عمارتوں میں پڑنے والی بڑی دراڑیں صرف ترپالوں سے ڈھکی ہوئی ہیں۔
غزہ میں جنگ 7 اکتوبر 2023 کو اس وقت شروع ہوئی تھی، جب حماس کے عسکریت پسندوں نے اسرائیل پر وہ دہشت گردانہ حملہ کیا تھا، جس میں تقریباً 1,200 افراد مارے گئے اور 251 یرغمال بنا لیے گئے تھے۔ حماس اب بھی تین یرغمالیوں کی لاشیں اپنے پاس رکھے ہوئے ہے، جن کی واپسی کے بغیر اسرائیل جنگ بندی کے دوسرے مرحلے کی طرف پیش رفت سے انکاری ہے۔

حماس کا کہنا ہے کہ ملبے تلے دبی لاشیں مل نہیں رہیں جبکہ اسرائیل اسے تاخیری حربہ قرار دیتا ہے۔
دس اکتوبر سے نافذ جنگ بندی کے پہلے مرحلے کا اختتام قریب ہے۔ اگلے مرحلے میں غزہ کے لیے عبوری حکومتی نظام کی تشکیل اور ایک بین الاقوامی استحکامی فورس کی تعیناتی شامل ہیں، مگر دونوں معاملات میں بےیقینی برقرار ہے۔
غزہ میں حماس کی زیر انتظام وزارت صحت کے مطابق اسرائیلی حملوں میں اب تک 69 ہزار 100 فلسطینی مارے جا چکے ہیں، جن میں بڑی تعداد خواتین اور بچوں کی تھی۔ یہ وزارت شہری آبادی اور جنگجوؤں میں فرق نہیں کرتی۔ جنگ نے غزہ کے بڑے حصے کو تباہ کر دیا ہے اور تقریباً 20 لاکھ آبادی میں سے 90 فیصد بے گھر ہو چکی ہے۔