ترکی میں پولیس کی یوم مئی کے موقع پر ریلیوں کے شرکاء پر آنسو گیس کی شیلنگ، درجنوں افراد گرفتار

ترکی کے سب سے بڑے شہر استنبول سے موصولہ رپورٹوں کے مطابق اس شیلنگ اور اس دوران گرفتاریوں کو نیوز ایجنسی اے ایف پی کے کئی صحافیوں نے ذاتی طور پر دیکھا۔

یوم مئی کے موقع پر جلوسوں اور ریلیوں کے دوران ترکی کے دو براعظموں میں واقع شہر استنبول کے یورپی حصے میں خاص طور پر مظاہرین کے دو ایسے گروپوں کے خلاف کارروائی کی گئی، جو مارچ کرتے ہوئے شہر کے تقسیم اسکوائر کی طرف جانا چاہتے تھے۔

استنبول شہر کا یہ علاقہ ماضی میں کئی مرتبہ بڑے حکومت مخالف احتجاجی مظاہروں کے لیے استعمال ہوتا رہا ہے اور اس مرتبہ قانون نافذ کرنے والے اداروں کے اہلکاروں نے اسے یوم مئی کے موقع پر ریلیوں کے پیش نظر جمعرات 30 اپریل کی رات ہی سربمہر کر دیا تھا۔

ترک میڈیا، جس میں اپوزیشن کی حامی نیوز ویب سائٹس بھی شامل ہیں، کے مطابق پولیس نے جمعے کے روز کی گئی کارروائیوں میں کم از کم 57 افراد کو گرفتار کر لیا۔

یکم مئی دنیا بھر میں ہر سال مزدوروں کے عالمی دن کے طور پر منایا جاتا ہے اور اسے یوم مئی بھی کہتے ہیں۔ اس روز دنیا بھر کے ممالک میں مزدوروں کے حقوق کے تحفظ کے لیے ریلیاں نکالی جاتی ہیں، جن کے واضح سیاسی پہلو بھی ہوتے ہیں۔

گزشتہ برس بھی یوم مئی کے موقع پر ترکی کے شہر استنبول میں کیے جانے والے احتجاجی مظاہروں اور ریلیوں کے دوران 400 سے زائد افراد کو گرفتار کر لیا گیا تھا۔