ترک مسلح افواج کے یومِ فتح کی 104ویں سالگرہ، جی ایچ کیو میں تقریب، آئی ایس پی آر کا خصوصی نغمہ جاری
اردو اور ترک زبان میں پیش کیے گئے نغمے میں پاکستان اور ترکیہ کے درمیان دوستی، بھائی چارے، مشترکہ ثقافت اور باہمی محبت کو اجاگر کیا گیا ہے۔
سید عاطف ندیم-ادارت
راولپنڈی: جنرل ہیڈ کوارٹرز (جی ایچ کیو) راولپنڈی میں ترک مسلح افواج کے یومِ فتح کی 104ویں سالگرہ کے موقع پر خصوصی تقریب منعقد ہوئی، جس میں پاکستان اور ترکیہ کے درمیان دیرینہ دوستی اور قریبی دوطرفہ تعلقات کو اجاگر کیا گیا۔
پاکستان میں ترکیہ کے سفیر عرفان نیزیرو اولو نے تقریب میں بطور مہمانِ خصوصی شرکت کی۔ تقریب میں فوجی افسران، ترکیہ کے سفارت خانے کے حکام اور دیگر معزز مہمان بھی موجود تھے۔
اس موقع پر پاکستان اور ترکیہ کے درمیان پائیدار بھائی چارے اور باہمی احترام پر مبنی تعلقات کو سراہا گیا۔ شرکاء نے ترک مسلح افواج کی بہادری اور قربانیوں کو خراجِ تحسین پیش کیا اور دونوں ممالک کے درمیان دیرینہ دفاعی و تزویراتی شراکت داری کو مزید مضبوط بنانے کے عزم کا اظہار کیا۔
تقریب کے اختتام پر ترکیہ کے عوام اور مسلح افواج کے لیے خیرسگالی کے جذبات کا اظہار کیا گیا۔
آئی ایس پی آر کا خصوصی نغمہ ’’دو دل، ایک جان‘‘ جاری
ترکیہ کے 104ویں یومِ فتح کے موقع پر پاک ترک دوستی کو خراجِ تحسین پیش کرنے کے لیے آئی ایس پی آر نے خصوصی نغمہ ’’دو دل، ایک جان‘‘ بھی جاری کیا۔
اردو اور ترک زبان میں پیش کیے گئے نغمے میں پاکستان اور ترکیہ کے درمیان دوستی، بھائی چارے، مشترکہ ثقافت اور باہمی محبت کو اجاگر کیا گیا ہے۔
نغمے کی موسیقی علی مصطفیٰ نے تیار کی، جبکہ اس کی کمپوزیشن کامران اللہ خان اور سامعہ گوہر نے ترتیب دی۔ نغمے کو عثمان رئیس اور ڈاکٹر مبشرہ حفیظ نے اپنی آوازوں سے پیش کیا۔
خصوصی نغمے میں اردو اور ترک زبان کے ساتھ روایتی سازوں کا امتزاج بھی شامل ہے، جبکہ اس پیشکش میں شریک تمام گائیک اور فنکار پاکستانی ہیں۔
’’دو دل، ایک جان‘‘ کے ذریعے پاکستان اور ترکیہ کی مشترکہ اقدار اور دونوں ممالک کے درمیان گہری دوستی اور بھائی چارے کو موسیقی کے انداز میں پیش کیا گیا ہے۔
جی ایچ کیو میں منعقدہ تقریب اور آئی ایس پی آر کی خصوصی پیشکش نے ترک یومِ فتح کے موقع پر پاکستان کی جانب سے ترکیہ کے عوام اور مسلح افواج کے لیے خیرسگالی اور پاک ترک دوستی کے جذبات کو نمایاں کیا۔
