توقع ہے کہ ینگ ڈاکٹرز شہریوں کو علاج معالجے کی بہتر سہولتوں کی فراہمی کے لئے وزیر اعلیٰ محسن نقوی کے ویژن کے مطابق کام کریں گے۔ وزیر پرائمری ہیلتھ
صوبے کے پانچ کم ترقی یافتہ اضلاع اٹک، میانوالی، بھکر، منڈی بہاؤالدین اور جھنگ کے ڈسٹرکٹ ہیڈ کوارٹر ہسپتالوں میں ڈاکٹروں کی پوسٹ گریجویشن شروع کی جا رہی ہے۔ ڈاکٹر جمال ناصر
لاہور پاکستان(نمائندہ وائس آف جرمنی):وزیر پرائمری و سیکنڈری ہیلتھ کیئر ڈاکٹر جمال ناصر نے بتایا ہے کہ وزیر اعلیٰ محسن نقوی کی ہدایت پر پاکستان کی تاریخ میں پہلی مرتبہ ڈسٹرکٹ ہیڈکوارٹر ہسپتالوں میں ڈاکٹروں کی پوسٹ گریجویٹ کلاسزشروع کی جا رہی ہیں۔ پاکستان کالج آف فزیشنز اینڈ سرجنز کے تعاون سے صوبے کے پانچ اضلاع اٹک، میانوالی، بھکر، منڈی بہاؤالدین اور جھنگ کے ڈسٹرکٹ ہیڈ کوارٹر ہسپتالوں میں ڈاکٹروں کی پوسٹ گریجویشن شروع کی جا رہی ہے۔اس اقدام سے پسماندہ اضلاع میں لوگوں کو سپیشلسٹ ڈاکٹروں کی خدمات میسرآ سکیں گی۔محکمہ صحت پنجاب نے ہماٹالوجی کو پتھالوجی کا حصہ بنا دیا ہے۔سنٹرل انڈکشن پالیسی کے تحت کلینیکل ہماٹالوجی میں پوسٹ گریجوایشن شروع کی جائے گی۔ہماٹالوجسٹ ڈاکٹروں کے لئے نئی آسامیاں تخلیق کی جائیں گی اور بلڈ بینک ہماٹالوجسٹ ڈاکٹروں کی زیر نگرانی چلائے جائیں گے۔
وہ گزشتہ روز ملاقات کے لئے آنے والے ینگ ڈاکٹرز ایسوسی ایشن کے وفد سے بات چیت کر رہے تھے۔وفد میں ینگ ڈاکٹرز ایسوسی ایشن کے صدر شعیب نیازی اور دیگر ڈاکٹرز شامل تھے۔ وزیر پرائمری ہیلتھ نے ڈاکٹر شعیب نیازی کو وائے ڈی اے کا صدر منتخب ہونے پر مبارکباد دی اور توقع ظاہر کی کہ ینگ ڈاکٹرز شہریوں کو علاج معالجے کی بہتر سہولتوں کی فراہمی کے لئے وزیر اعلیٰ محسن نقوی کے ویژن کے مطابق کام کریں گے۔
