پی اے ایف فنشنگ اسکول اسلام آباد میں گریجویشن تقریب کا انعقاد

اسلام آباد (نمائندہ وائس آف جرمنی):‌ پی اے ایف فنشنگ اسکول کے52ویں کورس کی گریجویشن تقریب آفیسرز میس، پی اے ایف کمپلیکس اسلام آباد میں منعقد ہوئی۔ بیگم مریم بابر جو کہ پاکستان ائیر فورس ویمن ایسوسی ایشن (پفوا) کی صدر اور پی اے ایف فنشنگ اسکول کی سرپرستِ اعلیٰ بھی ہیں اس تقریب کی مہمان خصوصی تھیں۔ مہمان خصوصی نے گریجویٹ ہونے والی طالبات میں سرٹیفیکیٹس بھی تقسیم کئے۔
مہمان خصوصی نے پرسنلٹی ڈیویلپمنٹ پروگرام کی کامیاب تکمیل پر طالبات کو مبارکباد پیش کی۔ انہوں نے ادار ے میں تربیت کے اعلیٰ معیار کی تعریف کی اور معاشرے کی خواتین کی صلاحیتوں کو نکھارنے کے لئے فیکلٹی ارکان کی کاوشوں کو بھی سراہا۔
قبل ازیں فنشنگ اسکول کی ڈائریکٹر مس زیبا شوکت نے کورس کی تفصیلات سے آگاہ کرتے ہوئے اِس کی نمایاں خصوصیات کو اجاگر کیا جن کا مقصد نوجوان بچیوں کو معاشرے کا مفید ممبر بنانا ہے۔
جولائی 1996ء میں قائم کردہ پی اے ایف فنشنگ اسکول ایشیاء میں اپنی طرز کا واحد ادارہ ہے جہاں خواتین کو مختلف کورسز بشمول کمیونیکیشن سکلز، لینگویجز، منیجمنٹ، آرٹ آف سیلف پریزنٹیشن، ڈومیسٹک سائنسز، عمومی ثقافت، روایتی کھانے، آداب میزبانی، بچوں کی دیکھ بھال، نفسیات، اور روحانی افزودگی کے شعبہ جات میں عملی تربیت دی جاتی ہے۔ خواتین کی صلاحیتوں میں نکھار لانے اور ملک میں تعلیم کے فروغ کے لئے پفوا کا یہ ادارہ اپنی کوششوں میں سرگرم ِ عمل ہے۔