گورنر نے وزیر اعلیٰ کے اعتماد کے ووٹ کے عمل کو تسلیم کرتے ہوئے خود ریکوزیش واپس لی ہے، فیاض الحسن چوہان

لاہور پاکستان (نمائندہ وائس آف جرمنی):‌ترجمان وزیر اعلیٰ پنجاب فیاض الحسن چوہان نے حمزہ شہباز کی جانب سے اعتماد کے ووٹ کے عمل کو ہدف تنقید بنانے پر اہم بیان دیتے ہوئے کہا کہ حمزہ شہباز کی طرف سے اسمبلی کے اندر وزیر اعلیٰ کے عدم اعتماد کے عمل کو ہدف تنقید بنانا مضحکہ خیز ہے۔ گورنر نے وزیر اعلیٰ کے اعتماد کے ووٹ کے عمل کو تسلیم کرتے ہوئے خود ریکوزیش واپس لی ہے۔ انہوں نے کہا کہ گورنر کا وکیل عدالت میں مان چکا ہے کہ وزیر اعلیٰ پنجاب نے اعتماد کا ووٹ لے لیا ہے۔دوسری طرف حمزہ شہباز ملک سے باہر بیٹھ کر سکون کے ستو اور بھنگ پی کر سویا ہوا ہے۔ انکا مزید کہنا تھا کہ حمزہ شہباز کو پتا ہی نہیں کہ وزیر اعلیٰ کے اعتماد کے ووٹ کا عمل آئینی ہے یا غیر آئینی ہے۔ حمزہ شہباز اعتماد کے ووٹ کے عمل کو غیر قانونی دیکر اپنی پارٹی اور گورنر کے اوپر عدم اعتماد کا اظہار کر رہا ہے۔اس بات سے حمزہ شہباز کے سیاسی شعور کا اندازہ لگایا جا سکتا ہے۔پنجاب اسمبلی کی تحلیل کی سمری گورنر کو پہنچ چکی ہے۔ان چوروں اور لٹیروں سے اب میدان میں ہی مقابلہ ہوگا۔انکا کہنا تھا کہ ” اب ہوائیں ہی کریں گی روشنی کا فیصلہ، جس دیئے میں جان ہوگی وہ دیا رہ جائے گا”۔ ن لیگ کے کاغذی شیر کو پنجاب میں بری طرح الیکشن میں چاروں شانے چت کر دیا جائیگا۔عمران خان کی قیادت میں پنجاب اور پورا پاکستان تعمیر و ترقی کے راستے پر گامزن ہوگا۔