چینی وزیرخارجہ نے پیوٹن سے ملاقات میں اہم پیغام دیدیا

روس کے صدر ولادیمیر پیوٹن نے سینٹ پیٹرزبرگ میں چین کے وزیر خارجہ وانگ یی سے ملاقات کی ہے۔
بین الاقوامی میڈیا رپورٹس کے مطابق چینی وزیرخارجہ نے پیوٹن کو بتایا چین روس کے ساتھ تجارتی تعاون جاری رکھنے کے لیے تیار ہے۔
وانگ یی روس کے چار روزہ دورے پر ہیں جو تعلقات کو مزید گہرا کرنے کی کوشش کر رہے ہیں اور اکتوبر میں پیوٹن کے چین کے تاریخی دورے سے قبل انتظامات پر بھی بات چیت کر رہے ہیں۔
روسی اخبار ویدوموستی کی رپورٹ کے مطابق پیوٹن نے اکتوبر میں چین کے دورے کی دعوت باضابطہ طور پر قبول کر لی ہے۔
بین الاقوامی فوجداری عدالت کی جانب سے یوکرین سے بچوں کی ملک بدری پر ان کے خلاف گرفتاری کے وارنٹ جاری کیے جانے کے بعد یہ پیوٹن کا پہلا بیرون ملک دورہ ہوگا۔ کریملن جنگی جرائم کے الزامات کو مسترد کرتا ہے۔
پیوٹن کے دورے کی خبر اسی دن جاری ہوئی جب انہوں نے سینٹ پیٹرزبرگ میں چینی وزیر خارجہ وانگ یی کی بات چیت کی میزبانی کی۔
ماسکو اور بیجنگ کے قریبی تعلقات نے مغرب کو محتاط کر دیا ہے۔ بیجنگ نے یوکرین میں ماسکو کے اقدامات کی عوامی سطح پر مذمت نہیں کی ہے لیکن اس نے روس، یوکرین اور یورپی ممالک میں ایک امن مندوب بھیجا ہے تاکہ بحران کے خاتمے کے لیے "سیاسی تصفیہ” تلاش کیا جا سکے۔