پاکستان: رود کوہیوں میں آئندہ چند روز تک سیلابی صورتحال برقرار رہنے کا خدشہ ہے

راجن پور (نمائندہ خصوصی جنوبی پنجاب پیر مشتاق رضوی): صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق اور ڈائریکٹرجنرل پی ڈی ایم اے عرفان علی کاٹھیا نے راجن پور کا دورہ کیا۔ڈی جی پی ڈی ایم اے نے صوبائی وزیر کو راجن پور میں ریسکیو و ریلیف سرگرمیوں بارے تفصیلی بریفنگ دی۔
صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے کہاکہ 19 اگست تک راجن پور کے 57 موضع جات زیر آب آئے۔ریسکیو سرگرمیوں میں 27 کشتیاں اور 96 ریسکیو ورکرز مصروف عمل ہیں۔ متاثرہ علاقوں میں 46 فلڈ ریلیف و میڈیکل کیپمس قائم کیے گئے جبکہ 229 لوگوں کو علاج و معالجہ کی سہولیات فراہم کی گئیں۔ خواجہ سلمان رفیق نے کہاکہ 909 افراد کو پیشگی محفوظ مقامات پر منتقل کیا گیا ہے۔ زیر آب علاقوں میں 9 ہزار 953جانوروں کی ویکسینیشن کی گئی۔ پی ڈی ایم اے و انتظامیہ کے بروقت ریسپانس سے کوئی جانی و مالی نقصان نہیں ہوا۔ صوبائی وزیرصحت نے کہاکہ سیلاب کے پانی سے مجموعی طور پر 207 گھر اور تقریباً 6 ہزار ایکڑ رقبہ متاثر ہوا ہے۔ سیلابی پانی سے 11 سڑکیں متاثر ہوئیں جن کی ٹوٹل لمبائی 31 کلومیٹر ہے۔ 2 سڑکوں کی بحالی کا کام ہنگامی بنیادوں پر مکمل کر لیا گیا ہے۔ وزیر اعلیٰ پنجاب کی ہدایات کے پیشِ نظر تمام متعلقہ ادارے الرٹ ہیں۔ خواجہ سلمان رفیق نے کہاکہ عوام الناس سے التماس ہے کہ ہنگامی صورتحال میں انتظامیہ سے تعاون کریں۔شہریوں کے انخلاء اور بحالی تک ریسکیو و ریلیف سرگرمیاں جاری رہیں گی۔
ڈائریکٹرجنرل پی ڈی ایم اے نے بریفنگ دیتے ہوئے کہاکہ رود کوہیوں میں آئندہ چند روز تک سیلابی صورتحال برقرار رہنے کا خدشہ ہے۔راجن پور کے ہل ٹورنٹس میں سیلابی صوتحال کے پیش نظر پی ڈی ایم اے کی ریسکیو و ریلیف سرگرمیاں جاری ہیں۔ ڈی جی پی ڈی ایم اے نے کہاکہ عوام ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔