کھیل کے آغاز سے قبل کنساس سٹی چیفس کے بارے میں توقع کی جارہی تھی کہ وہ امیریکن فٹ بال لیگ کا ٹائٹل مسلسل تیسرے سال بھی اپنے نام کر سکتی ہے۔ تاہم فلاڈیلفیا نے اندازے اور توقعات غلط ثابت کرکے کامیابی سمیٹی۔

یہ مقابلہ ریاست لوئزیانا کے شہر نیو اورلینز کے اسٹیڈیم’سیزر سپر ڈوم’ میں ہوا جو حسب روایت تماشائیوں سے کھچاکھچ بھرا ہوا تھا۔

فلاڈیفیا ایگلز نے کھیل کے تیسرے کوارٹر تک کنساس سٹی چیفس کو گول کرنے سے روکے رکھا جب کہ اس وقت تک فلاڈیلفیا ایگلز 34 پوائنٹس اپنے نام کر چکی تھی۔

فلاڈیفیا ایگلز کے کوارٹر بیک پر کھیلنے والے کھلاڑی جیلن ہرٹس کو سپربول کا ’موسٹ ویلیو ایبل پلیئر‘ (ایم وی پی) یا سب سے اہم پلیئر قرار دیا گیا۔

نیشنل فٹ بال لیگ (این ایف ایل) میں امیریکن فٹ بال کانفرنس اور نیشنل فٹ بال کانفرنس کی جیتنے والی ٹیمیں شریک ہوتی ہیں اور اس ٹورنامنٹ کے فائنل کو سپر بول کہا جاتا ہے۔

سن 1967 سے جاری سپر بول ہر سال جنوری یا فروری میں ہوتا ہے اور اس کا انعقاد امریکہ کے مختلف شہروں میں کیا جاتا ہے۔

امیریکن فٹ بال عالمی سطح پر کھیلے جانے والی فٹ بال سے مختلف ہے۔ اس میں ٹانگوں کے ساتھ ہاتھوں کا بھی استعمال کیا جاتا ہے۔ اس میں گیارہ گیارہ کھلاڑیوں پر مشتمل دو ٹیمیں ایک میدان میں ایک دوسرے کے مدِ مقابل ہوتی ہیں جس کے آخر میں گول کے کھمبے نصب ہوتے ہے۔

اس کھیل میں بیضوی یعنی انڈے کی شکل کی گیند استعمال ہوتی ہے جسے ہاتھ میں پکڑ کر مخالف ٹیم کے گول میں پہنچانا ہوتا ہے۔یہ کھیل امریکہ اور کینیڈا میں زیادہ مقبول ہے۔

امریکہ میں ‘سپر بول’ محض کھیل کا ایونٹ نہیں بلکہ اسے امریکی کلچر کا حصہ سمجھا جاتا ہے۔

فٹ بال کا کھیل امریکہ میں بڑے جوش و خروش سے دیکھا جاتا ہے اور ٹیم کی فتح شہر کے لیے ایک بڑا اعزاز سمجھی جاتی ہے اور سپر بول دیکھنے کے لیے اکثر کئی مقامات پر بڑی اسکرینیں بھی نصب کی جاتی ہیں۔

اس برس سپر بول کی انفرادیت یہ بھی تھی کہ اتوار کو کھیلے گئے فائنل میں امریکہ کے صدر ڈونلڈ ٹرمپ بھی شریک ہوئے۔ وہ اس ایونٹ میں شریک ہونے والے پہلے امریکی صدر ہیں۔

انہوں نے سپربول میں شرکت سے قبل جاری بیان میں کہا کہ فٹ بال بجا طور پر امریکہ کا سب سے مشہور کھیل ہے۔

بیان میں ڈونلڈ ٹرمپ نے مزید کہا کہ یہ قومی اتحاد کے جذبے کو پروان چڑھاتا ہے۔ یہ اہلِ خانہ، دوست اور کھیل کے شائقین کو ایک جگہ جمع کرتا ہے اور اس سے کمیونٹیز مضبو ط ہوتی ہیں۔

صدر نے مزید کہا کہ یہ سالانہ روایت ہمارے اختلافات سے بالاتر ہے اور ہماری مشترکہ حب الوطنی کی اقدار، خاندان، عقیدے اور آزادی کی عکاس ہے۔ ہمارے فوجی، قانون نافذ کرنے والےاہلکار بڑی جواں مردی اور بہادری سے ان اقدار کا دفاع کرتے ہیں۔

رواں برس لگ بھگ 12 کروڑ شائقین کے سپربول دیکھنے کا اندازہ لگایا گیا تھا۔

امریکہ میں اس ایونٹ کی مقبولیت کی وجہ سے سپربول کے لیے اشتہارات کی قیمتیں بہت زیادہ ہوتی ہیں۔ اس میں ٹی وی پر 30 سیکنڈزکے ایک اشتہار کی لاگت لگ بھگ 80 لاکھ ڈالر تک پہنچنے کا اندازہ لگایا گیا تھا۔

سپر بول امریکہ کے حقوق امریکہ کے چار نشریاتی اداروں کے پاس رہے ہیں جن میں اے بی سی، فاکس، این بی سی اور سی بی ایس شامل ہیں۔ رواں برس سپربول کے حقوق فاکس کے پاس تھے۔

مجموعی طورپ اسے سب سے زیادہ 22 بار سی بی ایس نے نشر کیا ہے۔ این بی سی نے 20، فاکس نے 11 جب کہ اے بی سی نے 7 بار سربول نشر کرنے کے حقوق حاصل کیے ہیں۔

سپربول سے قبل نئے سال کے آغاز پر نیو اورلینز میں ٹرک شہریوں پر چڑھانے کا دہشت گردی کا واقعہ پیش آیا تھا۔ ٹورنامنٹ کی افتتاحی تقریب میں اس واقعے میں ہلاک ہونے والے افراد اور فوری طور پر کارروائی کرنے والے اہلکاروں کو خراج عقیدت پیش کیا گیا۔