سید عاطف ندیم-پاکستان،وائس آف جرمنی اردو نیوز کے ساتھ
وزیراعظم محمد شہباز شریف سے سعودی عرب کی مسلح افواج کے چیف آف جنرل اسٹاف جنرل فیاض بن حامد الرویلی نے بدھ کے روز وزیراعظم ہاؤس اسلام آباد میں ملاقات کی، جس میں پاک–سعودی دفاعی تعاون، خطے کی سیکیورٹی اور دوطرفہ اسٹریٹجک شراکت داری کے فروغ پر تفصیلی گفتگو ہوئی۔
ملاقات کے آغاز میں وزیراعظم نے خادمِ حرمین شریفین شاہ سلمان بن عبدالعزیز آل سعود اور ولی عہد شہزادہ محمد بن سلمان بن عبدالعزیز کے لیے نیک خواہشات کا اظہار کیا۔ انہوں نے پاکستانی عوام اور قیادت کی جانب سے سعودی فرمانرواؤں اور عوام کے لیے بھائی چارے اور عزت و احترام کے جذبات کا اعادہ کیا۔
پاک–سعودی تعلقات، مشترکہ اقدار اور یکجہتی پر مبنی ہیں: وزیراعظم
وزیراعظم شہباز شریف نے جنرل الرویلی کا خیرمقدم کرتے ہوئے کہا کہ پاکستان اور سعودی عرب کے درمیان تعلقات مشترکہ عقیدے، یکساں اقدار اور باہمی اعتماد پر استوار ہیں۔ انہوں نے اس بات پر زور دیا کہ سعودی عرب نے مشکل ترین وقتوں میں بھی پاکستان کی غیر متزلزل حمایت کی، جسے پاکستان قدر کی نگاہ سے دیکھتا ہے۔
اسٹریٹجک دفاعی معاہدے (SMDA) کا ذکر
وزیراعظم نے گزشتہ دو ماہ میں ریاض کے اپنے کامیاب دوروں کا حوالہ دیا، جن کے دوران دونوں ممالک کے درمیان تاریخی اسٹریٹجک باہمی دفاعی معاہدے (SMDA) پر دستخط ہوئے۔
انہوں نے کہا کہ یہ معاہدہ پاک–سعودی دفاعی شراکت داری میں ایک نئے دور کا آغاز ہے، جس سے دونوں ممالک کے درمیان مشترکہ تربیت، عسکری مشقوں، ٹیکنالوجی اور مہارت کے تبادلے میں نمایاں اضافہ ہوگا۔
وزیراعظم نے دوطرفہ دفاعی تعاون کو مزید گہرا کرنے کے لیے پاکستان کے پختہ عزم کا اظہار کرتے ہوئے کہا کہ خطے میں امن و استحکام دونوں ممالک کے مشترکہ مفاد میں ہے۔
دہشت گردی اور انتہاپسندی کے خلاف مشترکہ عزم
وزیراعظم نے زور دیا کہ پاکستان اور سعودی عرب ہر قسم کی دہشت گردی اور انتہاپسندی کے خلاف متحد ہیں اور علاقائی سیکیورٹی کو مستحکم بنانے کے لیے مشترکہ کوششیں جاری رکھیں گے۔
سعودی قیادت کی نیک تمنائیں، دفاعی تعاون مزید بڑھانے کا اعلان
سعودی چیف آف جنرل اسٹاف جنرل فیاض بن حامد الرویلی نے سعودی قیادت کی جانب سے وزیراعظم شہباز شریف اور پاکستانی عوام کے لیے تہنیتی اور خیرسگالی کے پیغامات پہنچائے۔
انہوں نے کہا کہ سعودی عرب پاکستان کے ساتھ دفاعی اور تزویراتی تعاون کو مزید مضبوط، مؤثر اور جدید خطوط پر استوار کرنے کا خواہاں ہے، اور اس شراکت داری کو نئی بلندیوں تک پہنچایا جائے گا۔
اعلیٰ حکام کی شرکت
ملاقات میں نائب وزیراعظم و وزیر خارجہ سینیٹر اسحاق ڈار، چیف آف آرمی اسٹاف فیلڈ مارشل سید عاصم منیر، وزیر دفاع خواجہ محمد آصف، وزیراعظم کے معاون خصوصی سید طارق فاطمی اور دونوں ممالک کے اعلیٰ فوجی و سول حکام نے شرکت کی۔
