جناح انٹرنیشنل ایئرپورٹ کراچی پر نئے مین رن وے 07L/25R کا افتتاح

 سید عاطف ندیم پاکستان انٹرنیشل ایئر پورٹ ہیڈ آفس کے ساتھ

ہیڈکوارٹرز پاکستان ایئرپورٹس اتھارٹی، جناح انٹرنیشنل ایئرپورٹ (ٹرمینل ون) میں منعقدہ تقریب کے دوران سیکرٹری دفاع لیفٹیننٹ جنرل (ر) محمد علی نے جناح انٹرنیشنل ایئرپورٹ پر ازسرِنو تعمیر کیے گئے جدید ترین مین رن وے 07L/25R کا باقاعدہ افتتاح کر دیا۔ افتتاحی تقریب میں ایڈیشنل سیکرٹری دفاع میجر جنرل قیصر سلیمان نے بھی شرکت کی۔

اعلیٰ سطحی شرکت اور ادارہ جاتی نمائندگی

تقریب میں ایئر وائس مارشل ذیشان سعید (ڈائریکٹر جنرل پاکستان ایئرپورٹس اتھارٹی)، نادر شفیع ڈار (ڈائریکٹر جنرل پاکستان سول ایوی ایشن اتھارٹی)، ڈپٹی ڈی جی (ورکس اینڈ ڈیولپمنٹ) سمیر سعید، پراجیکٹ ڈائریکٹر حافظ زاہد اسحاق، ڈائریکٹر پلاننگ اینڈ ڈیولپمنٹ، ائیرپورٹ مینیجر عدنان خان سمیت دیگر اعلیٰ حکام نے شرکت کی۔ مختلف محکموں کے انجینئرز، ماہرین اور پراجیکٹ ٹیمیں بھی اس موقع پر موجود تھیں۔

عالمی معیار کے مطابق تعمیر: کوڈ 4F رن وے

نیا رن وے کوڈ 4F کا حامل ہے اور مکمل طور پر A380 جیسے بڑے مسافر طیاروں کی آپریشنل ضروریات کے لیے تیار کیا گیا ہے۔ یہ منصوبہ انٹرنیشنل سول ایوی ایشن آرگنائزیشن کے اینکس 14 کے مطابق محض 18 ماہ میں بغیر کسی تاخیر، اضافی لاگت، کلیم یا حادثے کے کامیابی سے مکمل کیا گیا—جو پاکستان کے ایوی ایشن انفراسٹرکچر میں ایک نمایاں سنگِ میل قرار دیا جا رہا ہے۔

سیکرٹری دفاع کا خطاب: پیشہ ورانہ صلاحیت کی روشن مثال

تقریب سے خطاب کرتے ہوئے سیکرٹری دفاع لیفٹیننٹ جنرل (ر) محمد علی نے کہا کہ یہ منصوبہ پاکستان کی پیشہ ورانہ صلاحیت، نظم و ضبط اور عالمی معیار کے مطابق انفراسٹرکچر فراہم کرنے کی بہترین مثال ہے۔ انہوں نے پاکستان ایئرپورٹس اتھارٹی کی قیادت، انجینئرز، ماہرین اور تمام متعلقہ ٹیموں کی کاوشوں کو سراہتے ہوئے کہا کہ مقررہ مدت اور منظور شدہ لاگت کے اندر رہتے ہوئے اس نوعیت کا منصوبہ مکمل کرنا قومی اعزاز ہے۔

اعزازی شیلڈز اور کامیابی کا جشن

تقریب کے دوران سیکرٹری دفاع اور ایڈیشنل سیکرٹری دفاع کو یادگاری شیلڈز پیش کی گئیں۔ اس کے علاوہ سیکرٹری دفاع نے ڈی جی پاکستان ایئرپورٹس اتھارٹی، ڈی جی پاکستان سول ایوی ایشن اتھارٹی نادر شفیع ڈار، ڈپٹی ڈی جی (ورکس اینڈ ڈیولپمنٹ)، پراجیکٹ ڈائریکٹر اور ڈائریکٹر پلاننگ اینڈ ڈیولپمنٹ کو ان کی مثالی خدمات کے اعتراف میں خصوصی اعزازی شیلڈز عطا کیں۔ کامیاب تکمیل کی خوشی میں کیک بھی کاٹا گیا۔

ملکی و بین الاقوامی ہوابازی کے لیے اہم پیش رفت

نئے رن وے 07L/25R کی تکمیل سے جناح انٹرنیشنل ایئرپورٹ کی آپریشنل استعداد، حفاظتی معیار اور بین الاقوامی رابطہ کاری میں نمایاں اضافہ ہوگا۔ ماہرین کے مطابق یہ منصوبہ نہ صرف بڑے طیاروں کی لینڈنگ و ٹیک آف کو مزید محفوظ بنائے گا بلکہ پاکستان کے ایوی ایشن سیکٹر کی عالمی مسابقت میں بھی اہم کردار ادا کرے گا۔