گجرات میں عزیز بھٹی شہید ڈی ایچ کیو ہسپتال میں پلر گر گیا صوبائی وزیر تعمیرات و مواصلات نے وقوعہ کا جائزہ لیا

لاہور پاکستان(نمائندہ وائس آف جرمنی):‌وزیر اعلیٰ پنجاب مریم نواز شریف کی ہدایت پر صوبائی وزیر تعمیرات و مواصلات ملک صہیب احمد بھرتھ و وزیر صحت خواجہ سلمان رفیق کی سربراہی میں سیکرٹری صحت پنجاب علی جان خان, سیکرٹری سی اینڈ ڈیبلیو سہیل اشرف، ڈپٹی کمشنر گجرات صفدر حسین ورک، ڈی پی او گجرات نے گجرات میں عزیز بھٹی شہید ڈی ایچ کیو ہسپتال کی فی میل سرجیکل وارڈ کے پلر پر زیادہ وزن آ جانے کی وجہ سے زمین بوس ہونے کے وقوعہ کا جائزہ لینے کے لیے دورہ کیا. ضلعی انتظامیہ گجرات اور ہسپتال انتظامیہ نے وقوعہ کے بارے میں صوبائی وزرا ملک صہیب احمد بھرتھ و خواجہ سلمان رفیق کو تفصیلی بریفنگ دی. انہوں نے جائے وقوعہ پر زمین بوس ہونے والے وارڈ کا خود جائزہ لیا.اس موقع پر بریفنگ کے دوران انتظامیہ نے بتایا کہ فی میل سرجیکل وراڈ کے نیچے والے حصہ پر مرمتی کام اود چھت پر سولر پینلز کی تنصیب کا کام جاری تھا جبکہ واقعہ کے لئے انکوائری رپورٹ مرتب کی جا رہی ہے، ڈپٹی کمشنر صفدر حسین ورک اور اے ڈی سی آر خضر حیات بھٹی اس کی انکوائری کر رہے ہیں۔ صوبائی وزرا ملک صہیب احمد بھرتھ اور خواجہ سلمان رفیق نے اس موقع پر کہا ہے کہ آج کے اس افسوس ناک واقعہ کے ذمہ داران کا تعین کرنے کے لیے کمیٹی تشکیل دے دی ہے جبکہ آئندہ ایسے واقعات کی روک تھام کے لئے صوبائی دفتر صحت سے تمام ہسپتالوں کے لئے ٹی او آرز / ایس او پیز جاری کئے جائیں گے، انہوں نے کہا ہے کہ ضلعی سطح پر ڈپی کمشنر گجرات صفدر حسین ورک اور صوبائی سطح پر محکمہ سی اینڈ ڈیبلیو کا ریسرچ ونگ اس واقعہ کی تیکنیکی لحاظ سے انکوائری کررہا ہے. صوبائی وزرا ملک صہیب احمد بھرتھ و خواجہ سلمان نے مزید کہا کہ انکوائری اور کمیٹی کی سفارشات کی روشنی میں ذمہ داران کے خلاف سخت کارروائی عمل میں لائی جائے گی. دوسری جانب صوبائی وزیر تعمیرات و مواصلات ملک صہیب احمد بھرتھ نے واقعہ میں ہلاک ہونے والی خاتون عظمت بی بی کے لواحقین سے اظہار افسوس کیا. انہوں نے اس واقعہ میں زخمی ہونے والے مریضوں کی عیادت کی اور ان سے وزیر اعلیٰ پنجاب مریم نواز شریف کی طرف سے تیمارداری کی. انہوں نے ہسپتال انتظامیہ کو زخمی مریضوں کو تمام تر طبی سہولیات فراہم کرنے کی ہدایت کی. انہوں نے متعلقہ حکام کو ہدایت کی کہ ہسپتال کے زمین بوس ہونے والے سٹرکچر کو فوری مرمت کیا جائے تاکہ عوام الناس کو علاج معالجہ کی سہولیات بلاتعطل جاری رہیں۔