صوبائی وزیر صنعت و تجارت چوہدری شافع حسین کا ٹیوٹا سیکرٹریٹ کا دورہ، شجر کاری مہم کے حوالے سے پودا لگایا
صوبائی وزیر صنعت و تجارت نے کہاکہ ٹیوٹا کے اداروں میں موجود لیبز کو اپ گریڈ کیا جائے گا۔ٹیچرز ٹریننگ پروگرام انتہائی اہمیت کا حامل ہے
لاہور پاکستان(نمائندہ وائس آف جرمنی): صوبائی وزیر صنعت و تجارت چوہدری شافع حسین نے ٹیوٹا سیکرٹریٹ کا دورہ کیا۔ شجر کاری مہم کے حوالے سے پودا لگایا اور بریفنگ اجلاس کی صدارت کی۔صوبائی وزیر نے ٹیوٹا کے اداروں کیلئے تیار کردہ قوی ترانہ کا اجراء کیا ۔چیئرمین ٹیوٹا بریگیڈیئر ریٹائرڈ محمد ساجد کھوکھر نے صوبائی وزیرکو ادارے کی ورکنگ، کارکردگی اور آئندہ کے لائحہ عمل بارے بریفنگ دی۔
صوبائی وزیر صنعت و تجارت چوہدری شافع حسین نے کہاکہ ٹیوٹا کے اداروں میں سکالر شپ پروگرام شروع کئے جائیں۔ آرٹیفیشل انٹیلی جنس، سولر پینل ٹیکنالوجی اور کرین آپریٹرزکے کورسز بھی شروع کئے جائیں۔صوبائی وزیرصنعت و تجارت نے سافٹ ویئر کورسز اور سکلز لیبر کی بیرون ممالک اور مقامی انڈسٹری میں کھپانے بارے پلان طلب کیا۔
انہوں نے سرامکس کالج گجرات کی 10سال سے بندش کی رپورٹ مانگ لی۔
صوبائی وزیر صنعت و تجارت نے کہاکہ ٹیوٹا کے اداروں میں موجود لیبز کو اپ گریڈ کیا جائے گا۔ٹیچرز ٹریننگ پروگرام انتہائی اہمیت کا حامل ہے، غیر ملکی ٹیچرز کو پروگرام میں شامل کیا جائے۔چوہدری شافع حسین نے کہاکہ ٹیوٹا کو نوجوانوں کو جدید علوم سے آراستہ کرنے کے حوالے سے اپنا مؤثر کردار ادا کرنا ہے۔صوبائی وزیر نے ہدایت کی کہ چائنیزلینگوئج کے علاوہ عریبک، جرمن اور جاپانیزلینگوئجزکے کورسزکا اہتمام کیاجائے۔
انہوں نے کہاکہ ٹیوٹا کے اداروں کو عالمی معیارکے مطابق ڈھالا جائے گا تاکہ یہاں سے ہنر سیکھ کرطلباء بیرون ممالک جاکر ملک کیلئے قیمتی زرمبادلہ کماسکیں۔چیئرمین ٹیوٹا محمد ساجد کھوکھر نے کہاکہ ٹیوٹا کے اداروں میں 3ماہ سے لے کر 4سال تک کے مختلف کورسز کرائے جا رہے ہیں جبکہ پنجاب کی 13جیلوں اور 23دینی اداروں میں شارٹ کورسز کرائے جا رہے ہیں۔ چیئرمین ٹیوٹامحمد ساجد کھوکھر نے صوبائی وزیرکو بریفنگ دیتے ہوئے کہاکہ ٹیوٹا کے اداروں میں 91ہزار بچے ٹیکنیکل ایجوکیشن حاصل کررہے ہیں۔سیکرٹری صنعت و تجارت احسان بھٹہ، چیف آپریٹنگ آفیسر قراتہ العین، سینئر ڈائریکٹر جنرل اختر عباس بھروانہ اور دیگر سینئر افسران نے اجلاس میں شرکت کی۔
