وفاقی وزیر داخلہ محسن نقوی کی ہدایت پر ڈپلومیٹک انکلیو میں تاریخ میں پہلی بار "کیس کیڈ” جدید ترین پولیس خدمت مرکز کا قیام

اسلام آباد(نمائندہ وائس آف جرمنی):‌ وفاقی وزیر داخلہ محسن نقوی کی ہدایت پر ڈپلومیٹک انکلیو میں تاریخ میں پہلی بار "کیس کیڈ” جدید ترین پولیس خدمت مرکز قائم کر دیا گیا ہے۔ جس میں ڈپلومیٹک کمیونٹی اور غیر ملکی شہریوں کو 12 سے زائد خدمات ایک چھت تلے ملیں گی۔ وفاقی وزیر داخلہ محسن نقوی نے ڈپلومیٹک انکلیو میں سفارتکاروں کی سہولت کیلئے قائم "کیس کیڈ” پولیس خدمت مرکز کا افتتاح کیا۔ جس میں ڈرائیونگ لائسنس کے اجراء و تجدید،کریکٹر سرٹیفکیٹ ، جنرل پولیس تصدیق، گمشدگی رپورٹ ، کرایہ داروں کی رجسٹریشن کی سہولت، غیر ملکیوں کی رجسٹریشن، گھریلو ملازمین کی رجسٹریشن، رضا کاروں کی رجسٹریشن،گاڑیوں کی تصدیق اورایف آئی آر کی کاپی کے حصول جیسی خدمات میسر ہو گی۔ افتتاحی تقریب میں بطور مہمان خصوصی بات چیت کرتے ہوئے وزیر داخلہ محسن نقوی نے کہا کہ وزیر اعظم کے ویژن کے مطابق سفراء اور غیرملکیوں کی سہولت اور حفاظت کیلئے ہر ممکن اقدامات کو یقینی بنا رہے ہیں۔ انہوں نے کہا کہ یہ مرکز سفارتی برادری اور تمام مہمانوں کے لیے سیکورٹی و خدمات کی فراہمی کے ہمارے عزم کی عکاسی کرتا ہے، خدمت مرکز میں سفارتکاروں اور غیر ملکی شہریوں کو تمام سہولیات ایک چھت تلے ملیں گے۔ وفاقی وزیر داخلہ نے اپنے خیالات کا اظہار کرتے ہوئے مزید کہا کہ ڈپلومیٹک انکلیو سمیت پورے دارالحکومت کو خوبصورت بنانا مشن ہے۔ انہوں نے کہا کہ خدمت مرکز کے قیام سے قانون نافذ کرنے والے اداروں اور سفارتکاروں کی مابین روابط اور باہمی تعاون مزید مضبوط ہوں گے۔ انہوں نے مزید کہا کہ 1500 سے زائد پولیس و ایف سی اہلکار اور 20 پولیس گاڑیاں ڈپلومیٹک انکلیو کی سیکورٹی پر مامور ہیں۔ وفاقی وزیر داخلہ محسن نقوی نے سفارت کاروں کے ہمراہ کیس کیڈ خدمت مرکز کا دورہ کیا اور پولیس خدمت مرکز کے مختلف کاؤنٹرز کا معائنہ کیا اور سہولتوں کا جائزہ لیا۔ آئی جی اسلام آباد پولیس علی ناصر رضوی نے غیر ملکی شہریوں کو فراہم کی جانے والی تمام سہولیات کے بارے میں بریفنگ دی۔ اس موقع پر تقریب میں شریک سفارت کاروں اور غیر ملکی شہریوں نے ڈپلومیٹک انکلیو میں کیس کیڈ خدمت مرکز کے قیام پر وزیر داخلہ محسن نقوی کا شکریہ ادا کیا۔ تقریب میں غیر ملکی سفارت کاروں نے بڑی تعداد میں شرکت کی۔ وفاقی سیکرٹری داخلہ خرم آغا، آئی جی اسلام آباد پولیس علی ناصر رضوی، ڈی سی اسلام آباد اور اسلام آباد پولیس کے سینئر افسران بھی اس موقع پر موجود تھے۔