اوورسیز پاکستانیوں کے لیے اسلام آباد انتظامیہ اور سی ڈی اے میں سہولت ڈیسک قائم
اوورسیز پاکستانیوں کو ہمیشہ یہ شکایت رہی ہے کہ ملک میں سرکاری ادارے ان کے ساتھ وہ تعاون نہیں کرتے جو وہ چاہ رہے ہوتے ہیں۔
وفاقی حکومت نے بیرونِ ملک مقیم پاکستانیوں کو خدمات کی فراہمی کے لیے پولیس خدمت مرکز کے بعد اسلام آباد کی انتظامیہ کے تمام دفاتر تک رسائی کے لیے سپورٹ ڈیسک قائم کیے ہیں جن کے باعث اوورسیز پاکستانیوں کے بہت سے مسائل حل ہو پائیں گے۔
اوورسیز پاکستانیوں کو ہمیشہ یہ شکایت رہی ہے کہ ملک میں سرکاری ادارے ان کے ساتھ وہ تعاون نہیں کرتے جو وہ چاہ رہے ہوتے ہیں۔
ان شکایات کے ازالے کے لیے محکمۂ پولیس میں پہلے ہی خدمت مرکز قائم کیا جا چکا ہے اور اب کیپیٹل ڈویلپمنٹ اتھارٹی (سی ڈی اے) اور متعلقہ سرکاری اداروں کے مددگار ڈیسک قائم کیے جا چکے ہیں۔
اسلام آباد پولیس، محکمۂ ریوینیو، سی ڈی اے اور آئی سی ٹی انتظامیہ سمیت متعلقہ حکام پر مشتمل ایک ٹیم سمندر پار پاکستانیوں کی مدد اور سروس کاؤنٹرز پر خدمات فراہم کرنے کے لیے موجود ہے۔
حکام وزارت سمندر پار پاکستانیز کے مطابق بیرون ملک مقیم پاکستانیوں کے تحفظات کو دور کرنے، سرکاری اداروں میں ان کے ساتھ تعاون بڑھانے اور مسائل کے حل کے لیے اسلام آباد انتظامیہ کے دفاتر میں ’اوورسیز پاکستانیوں کے لیے سپورٹ ڈیسک‘ قائم کیے گئے ہیں۔‘
’ان کے تحت متعلقہ اداروں میں ون ونڈو کے تحت اوورسیز پاکستانیوں کو سہولیات فراہم کی جائیں گی۔‘
حکام کے مطابق وزارت اوورسیز اور سی ڈی اے کی مشترکہ کوششوں کے نتیجے میں قائم ہونے والے سہولت ڈیسک سمندر پار پاکستانیوں کے تحفظات کو دور کرنے کے لیے ایک اہم سنگ میل کی حیثیت رکھتے ہیں۔
