لاہور میں اورنج ٹرین کو سولر پر منتقل کرنے کے منصوبے پر کام جاری ہے ۔ صوبائی وزیر ٹرانسپورٹ ابراہیم حسن مراد

لاہور پاکستان(نمائندہ وائس آف جرمنی): صوبائی وزیر ٹرانسپورٹ ابراہیم حسن مراد نے اپنے جاری کردہ ایک بیان میں کہا کہ وزیر اعلٰی پنجاب کی ہدایت پر پہلے مرحلے میں لاہور میں اورنج ٹرین کو سولر پر منتقل کرنے کے منصوبے پر کام تیزی سے جاری ہے۔
صوبائی وزیر نے کہا کہ محکمہ توانائی کی سفارش پر نیسپاک کے ساتھ بات چیت حتمی مراحل میں داخل ہو چکی ہے تاہم نیسپاک کے ساتھ معاہدے پر دستخط کرنے کے بعد 3 ماہ کے اندر اسٹڈی مکمل کی جائے گی جبکہ اسٹڈی کے بعد سولرائزیشن کا منصوبہ شروع ہو جائے گا۔ صوبائی وزیر نے مزید کہا کہ اورنج ٹرین کے ڈپو ، سٹبلنگ یارڈ اور سٹیشنز پر سولر پینل لگائے جائیں گے جبکہ سٹبلنگ یارڈ اور اورنج ٹرین ڈپو پر سولر گرڈ سٹیشن بنائے جائیں گے۔ ابراہیم حسن مراد نے کہا کہ اورنج ٹرین کے ساتھ ساتھ سٹیشنز بھی سولر انرجی پر منتقل ہونگے جبکہ ایک اندازے کے مطابق سالانہ 3 ارب سے زائد کی بچت ممکن ہو سکے گی۔