وزیر تعلیم رانا سکندر حیات سے وزیر صحت خواجہ عمران نذیر کی ملاقات

پاکستان،لاہور(نمائندہ وائس آف جرمنی): وزیر تعلیم رانا سکندر حیات سے وزیر صحت خواجہ عمران نذیر نے ملاقات کی، تعلیمی اداروں میں نیوٹریشن پروگرام کے آغاز اور ہیلتھ سروسز کی فراہمی پر تبادلہ خیال کیا۔ وزیر تعلیم نے گفتگو کرتے ہوئے کہا کہ طلبہ کیلئے نیوٹریشن پروگرام کا پائیلٹ پراجیکٹ رائیونڈ تحصیل سے شروع کیا جائے گا۔ پائیلٹ پراجیکٹ کی کامیابی کے بعد اس ماڈل کو تمام سکولوں تک پھیلائیں گے۔ ملاقات میں وزیر تعلیم اور وزیر صحت مابین نیوٹریشن پروگرام میں خوراک کے معیار پر کسی قسم کا سمجھوتہ نہ کرنے پر اتفاق کیا گیا۔ وزیر تعلیم نے کہا کہ کھانا سپلائی کرنے والی فرموں کے ٹینڈر کا عمل جلد مکمل کر لیا جائَے گا۔ وزیر صحت نے کہا کہ منتخب فرم کو کھانے کے معیار کا خاص خیال رکھنا ہوگا۔ غیر معیاری کھانا سپلائی کرنے والی فرم کو ہر سطح پر بین کریں گے۔ عمران نذیر نے کہا کہ طلبہ کو ہیتلھ سروسز کی بہتر فراہمی کیلئے بھی اہم اقدامات بروئے کار لائے جائیں گے۔ وزیر تعلیم نے کہا کہ سٹوڈنٹ ہیلتھ پروگرام اور نیوٹریشن پروگرام سے 70 لاکھ کے قریب طلبہ مستفید ہوں گے۔