پاکستان

پاکستان: پنجاب ہائی وے پٹرول صوبہ بھر میں شاہرات پر شہریوں کی خدمت و تحفظ اور قوانین کی پاسداری کیلئے سرگرم عمل رہی

ایکسل لوڈ کی خلاف ورزی پر 8 لاکھ 69 ہزار اوور لوڈڈ گاڑیوں کے خلاف قانونی کارروائی کی گئی جبکہ گیس سلنڈر کے غیر قانونی استعمال پر 12 ہزار سے زائد گاڑیوں کے خلاف کارروائی کی گئی

(سید عاطف ندیم-پاکستان) پنجاب ہائی وے پٹرول (پی ایچ پی)نے صوبہ بھر میں شاہرات پر شہریوں کی خدمت و تحفظ اور قوانین کی پاسداری سے متعلق سال 2024 کی سالانہ کارکردگی رپورٹ جاری کر دی ہے۔ ترجمان پنجاب پولیس نے تفصیلات سے آگاہ کرتے ہوئے بتایا کہ 2024 میں پی ایچ پی نے شاہرات پر بذریعہ ای پولیس پوسٹ ایپ 31.4 ملین افراد کو چیک کیا جبکہ دورانِ چیکنگ 6537 اشتہاری مجرمان اور عدالتی مفروران کو گرفتار کیا گیا۔ انہوں نے مزید بتایا کہ پنجاب بھر کی شاہرات پر 18.8 ملین گاڑیوں کو چیک کیا گیا اور 3350 چوری شدہ گاڑیاں / موٹر سائیکلیں برآمد کی گئیں۔ ترجمان نے مزید بتایا کہ ایکسل لوڈ کی خلاف ورزی پر 8 لاکھ 69 ہزار اوور لوڈڈ گاڑیوں کے خلاف قانونی کارروائی کی گئی جبکہ گیس سلنڈر کے غیر قانونی استعمال پر 12 ہزار سے زائد گاڑیوں کے خلاف کارروائی کی گئی۔ ترجمان پنجاب پولیس نے مزید بتایا کہ شہریوں کی سہولت کے پیشِ نظر ایک لاکھ 48 ہزار ڈرائیونگ لائسنس جاری کیے گئے اور 678 گمشدہ بچوں کو ان کے والدین سے ملوایا گیا۔ 5005 عارضی و مستقل تجاوزات کو ختم کر کے ٹریفک کے بہاؤ کو بہتر بنایا گیا جبکہ ایک لاکھ 12 ہزار سے زائد مسافروں کو شاہرات پر مختلف نوعیت کی مدد و راہنمائی فراہم کی گئی۔ ترجمان پنجاب پولیس نے کہا کہ پولیس خدمت مراکز پر 1یک لاکھ 19 ہزار شہریوں کو مختلف پولیسنگ خدمات فراہم کی گئیں اور ناجائز اسلحہ کے استعمال پر 1093 مقدمات درج کرتے ہوئے سینکڑوں ملزمان گرفتار کیے گئے۔ منشیات فروشوں سے 20925 لیٹر شراب، 400 کلوگرام چرس اور 53 کلو گرام افیون اور ساڑھے پانچ کلوگرام ہیروئن برآمد کی گئی۔ آئی جی پنجاب ڈاکٹر عثمان انور نے بہترین کارکردگی پر پنجاب ہائی وے پٹرول کے افسران و اہلکاروں کو شاباش دیتے ہوئے ہدایت کی کہ رواں سال بھی ٹریفک کی روانی، شہریوں کی خدمت و حفاظت کیلئے بھرپور محنت اور خلوص نیت سے فرائض سر انجام دئیے جائیں۔

مزید دکھائیں

متعلقہ مضامین

Back to top button