انسانی اعضاء کی پیوندکاری کے غیر قانونی کاروبار میں ملوث عناصر کے گرد گھیرا تنگ
وزیر اعلیٰ پنجاب مریم نواز شریف کی قیادت میں عوام کیلئے صحت کے بنیادی اقدامات اٹھائے جا رہے ہیں
(سید عاطف ندیم-پاکستان): صوبائی وزیر صحت خواجہ سلمان رفیق کی زیر صدارت پنجاب ہیومن آرگن ٹرانسپلانٹیشن اتھارٹی میں اہم اجلاس منعقد ہوا۔ اس موقع پر ڈائریکٹر جنرل پی ہوٹا پروفیسر محمد عامر زمان خان، وائس چانسلر کنگ ایڈورڈ میڈیکل یونیورسٹی پروفیسر محمود ایاز، وائس چانسلر فاطمہ جناح میڈیکل یونیورسٹی پروفیسر خالد مسعود گوندل، صدر پاکستان میڈیکل ایسوسی ایشن ڈاکٹر محمد اظہار چوہدری، پروفیسر شہزاد انور، چیئرمین بورڈ سمز پروفیسر اسد اسلم خان، ڈپٹی سیکرٹری حافظ عرفان، سی ای او پنجاب ہیلتھ انشی ایٹو مینجمنٹ کمپنی ڈاکٹر علی رزاق، پرنسپل سرگودھا میڈیکل کالج پروفیسر محمد وارث فاروقہ و دیگر نے شرکت کی۔ اجلاس کے دوران پنجاب ہیومن آرگن ٹرانسپلانٹیشن اتھارٹی کے تمام سابق ڈائریکٹرز جنرل کی خدمات کو سراہا گیا۔ اس موقع پر پی ہوٹا کے تمام ڈائریکٹرز نے بھی شرکت کی۔ پی ہوٹا کو ترمیمی بل کو بھی فولواپ کرنے کی ہدایت کی گئی۔ انسانی اعضاء کی پیوندکاری کے غیر قانونی کاروبار میں ملوث عناصر کے گرد گھیرا تنگ کرنے جا رہے ہیں۔ پی ہوٹا کے ویجیلنس سیل کی کارکردگی کو بھی سراہا گیا ہے۔ صوبائی وزیر محکمہ سپیشلائزڈ ہیلتھ کیئر اینڈ میڈیکل ایجوکیشن خواجہ سلمان رفیق نے اس موقع پر کہا کہ وزیر اعلیٰ پنجاب مریم نواز شریف کی قیادت میں عوام کیلئے صحت کے بنیادی اقدامات اٹھائے جا رہے ہیں۔ چیف منسٹرز چلڈرن ہارٹ سرجری پروگرام، چیف منسٹرز ڈائیلسز پروگرام اور چیف منسٹرز سپیشل انشی ایٹو فار ٹرانسپلانٹ پروگرام حکومت پنجاب کے فلیگ شپ پروگرامز ہیں۔ پی ہوٹا کی دیگر صوبوں کی اتھارٹیز سے بھی کوآرڈی نیشن کو بڑھائیں گے۔ پی ہوٹا کو ڈونرز کی رجسٹری بنانے کی ہدایت کی گئی ہے۔ پی ہوٹا کے سب آفسز کو بھی مزید فعال بنائیں گے۔ چیف منسٹرز سپیشل انشی ایٹو فار ٹرانسپلانٹ پروگرام کے حوالہ سے پی ہوٹا کو اہم ٹاسکس سونپے گئے ہیں۔ عوام تک صحت کی بہترین سہولیات کی فراہمی کیلئے کوشاں ہیں۔ پنجاب میں انسانی اعضاء کی غیر قانونی پیوندکاری کا کاروبار چلنے نہیں دیں گے۔ ڈی جی پی ہوٹا کو اس حوالہ سے متحرک کردار ادا کرنے کی ہدایت کی گئی ہے۔
