لینڈ یوز قوانین کی خلاف ورزی کرنے والوں کے خلاف سخت قانونی ایکشن مسلسل جاری رہے گا۔ کمشنر لاہور و ڈی جی ایل ڈی اے
کمشنر لاہور و ڈی جی ایل ڈی اے محمد علی رندھاوا کی ہدایت پر شہر میں لیونگ انوائرمنٹ میں بہتری کے لیے بنائی گئی کمیٹی کا اجلاس۔ اجلاس میں 9 ماڈل شاہراہوں پر تجاوزات کے خاتمے کے لیے جاری اقدامات کا جائزہ لیا گیا۔ لاہورمیں سائیکلنگ کلچر کو فروغ دینے کے لیے خصوصی اقدامات کیے جائیں گے۔
لاہور پاکستان(نمائندہ وائس آف جرمنی): لاہور ڈویلپمنٹ اتھارٹی کے زیر اہتمام لاہور شہر میں لیونگ انوائرمنٹ میں بہتری کے لیے جائزہ کمیٹی کا اجلاس گزشتہ روز منعقد ہوا۔کمشنر لاہور و ڈی جی ایل ڈی اے کی ہدایت پر ایڈیشنل ڈی جی ہاؤسنگ کیپٹن ر شاہمیر اقبال نے اجلاس کی صدارت کرتے ہوئے 9 ماڈل شاہراہوں پر تجاوزات کے خاتمے و گرینری کے لیے کیے گئے اقدامات کا جائزہ لیا گیا۔اجلاس میں بتایا گیا کہ صوبائی دارالحکومت میں سائیکلنگ کے کلچر کو فروغ دینے کے لیے خصوصی اقدامات کیے جارہے ہیں اور اس سلسلے میں پہلے مرحلے پر ماڈل شاہراؤں پر سائیکلنگ کے لیے ایک لین مخصوص کی جائے گی۔
اجلاس میں پارکنگ کے لیے مختص جگہوں پر تجاوزات کے خاتمے کے لیے کیے گئے آپریشن پر بریفنگ دی گئی۔ ایڈیشنل ڈی جی ہاؤسنگ ایل ڈی اے کیپٹن ر شاہمیر اقبال کا کہنا تھا کہ کمشنر و ڈی جی ایل ڈی اے محمد علی رندھاوا کی ہدایت پر ماڈل شاہراہوں پر غیر قانونی پارکنگ و اوور چارجنگ کے خلاف پارکنگ کمپنی کو ایکشن لینے کی ہدایات جاری کی جا چکی ہیں۔ماڈل شاہراہوں پر قائم ریستورانوں، بڑے سٹورز و کمرشل املاک پر بلڈنگ اینڈ زوننگ ریگولیشن کے مطابق پارکنگ کے لیے مختص جگہ پر عملدرآمدہر صورت ممکن بنایا جائے گا۔اجلاس میں چیف ٹاؤن پلانر شکیل انجم منہاس نے بتایا کہ لینڈ یوز قوانین کی خلاف ورزی کرنے والوں کے خلاف سخت قانونی ایکشن جاری ہے۔
چیف ٹاؤن پلانرایل ڈی اے شکیل انجم منہاس اور ڈائریکٹر لاء قاسم بھٹی نے اجلاس میں شرکا ء کو بریفنگ دی۔اجلاس میں ایڈوکیٹ سپریم کورٹ معظم علی شاہ، چیف میٹروپولییٹن پلاننگ ایل ڈی اے ندیم اختر زیدی، ٹریفک پولیس، ایم سی ایل، ٹیپا اور پی ایچ اے کے افسران نے شرکت کی۔
