عزم و ہمت کی اعلیٰ مثال: گوجرانوالہ کی بینائی سے محروم پاکستانی ہونہار طالبہ زینب کی 11ویں جماعت کے امتحان میں شاندار کامیابی
زینب نے ہمت نہ ہاری اور ایک عام گورنمنٹ کالج میں دیگر عام طالبات کے ساتھ باقاعدہ تعلیم حاصل کرتے ہوئے یہ شاندار اور تاریخ ساز کامیابی اپنے نام کی۔
رانا ذاہد اشفاق-پاکستان
معذوری، محدود وسائل اور مشکلات کبھی راستے کی رکاوٹ نہیں بن سکتے، اس بات کو سچ کر دکھایا ہے گوجرانوالہ کی بینائی سے محروم ہونہار طالبہ زینب نے، جنہوں نے گوجرانوالہ بورڈ کے سالانہ امتحانات 2026ء میں گیارہویں جماعت (11th Class) کے امتحان میں 600 میں سے 552 نمبر حاصل کر کے نمایاں پوزیشن حاصل کی ہے۔
مشکلات اور ناکافی سہولیات کے باوجود تاریخ رقم:
گوجرانوالہ جیسے بڑے شہر میں بینائی سے محروم بچوں کے لیے صرف مڈل تک تعلیمی ادارے کی سہولت موجود ہے، جبکہ ہائی اسکول یا کالج کی سطح پر اسپیشل ایجوکیشن کا کوئی ادارہ قائم نہیں ہے۔ اس کے باوجود زینب نے ہمت نہ ہاری اور ایک عام گورنمنٹ کالج میں دیگر عام طالبات کے ساتھ باقاعدہ تعلیم حاصل کرتے ہوئے یہ شاندار اور تاریخ ساز کامیابی اپنے نام کی۔
محدود وسائل، انتھک محنت اور باپ کی قربانی:
طالبہ کا تعلق ایک متوسط طبقے کے گھرانے سے ہے۔ ان کے والد ایک نجی کمپنی میں محض 40 ہزار روپے ماہانہ پر ملازم ہیں۔ محدود اور تنگ وسائل کے باوجود زینب کی انتھک محنت، عظیم ہمت اور مستقل مزاجی نے ثابت کر دیا کہ سچی لگن ہو تو ہر منزل آسان ہو جاتی ہے۔
آئندہ کا عزم اور خواہش:
اپنی شاندار کامیابی پر بات کرتے ہوئے زینب نے عزم ظاہر کیا کہ وہ اگلے سال (بارہویں جماعت) کے امتحانات میں بھی اسی طرح نمایاں پوزیشن حاصل کر کے گوجرانوالہ بورڈ سے گولڈ میڈل حاصل کرنا چاہتی ہیں۔ ان کا خواب ہے کہ وہ اعلیٰ تعلیم حاصل کر کے کسی اعلیٰ عہدے پر فائز ہوں اور ملک و قوم کا نام روشن کر سکیں۔
