لاہور پولیس کا سنگین مقدمات میں ملوث اشتہاری و عادی مجرموں اور عدالتی مفروروں کے خلاف کریک ڈاؤن تیزی سے جاری ہے

لاہور پاکستان(نمائندہ وائس آف جرمنی):‌سربراہ لاہور پولیس ایڈیشنل آئی جی بلال صدیق کمیانہ نے کہا ہے کہ لاہور پولیس کے لئے سب سے بڑا چیلنج اشتہاری و عادی مجرموں کی گرفتاری ہے کیونکہ شہر میں ہونے والے بیشتر جرائم میں یہی بدنام زمانہ پیشہ ور اشتہاری و عادی مجرم ملوث پائے گئے ہیں۔سی سی پی او بلال صدیق کمیانہ کی ہدایت پر لاہور پولیس کا سنگین مقدمات میں ملوث اشتہاری و عادی مجرموں اور عدالتی مفروروں کے خلاف کریک ڈاؤن تیزی سے جاری ہے۔تفصیلات کے مطابق لاہورپولیس نے رواں سال اب تک 12 ہزار 886 اشتہاری،عادی مجرم اور عدالتی مفرور گرفتار کر لئے ہیں۔سی سی پی او بلال صدیق کمیانہ نے تمام ڈویژنل افسران اور ایس ڈی پی اوزکو اشتہاری مجرم پکڑنے کا ٹاسک دیا ہے۔سربراہ لاہور پولیس بلال صدیق کمیانہ نے کہا ہے کہ خصوصی مہم کےتحت روزانہ کی بنیاد پراشتہاری و عادی مجرم اور عدالتی مفرور گرفتار کئے جا رہے ہیں۔سی سی پی او لاہور نے ہدایت کی ہے کہ آپریشنز، انوسٹی گیشن،اینٹی وہیکلز لفٹنگ سٹاف اور سی آئی اے مشترکہ طور پر اشتہاری، عادی اور عدالتی مجرم گرفتار کریں۔لاہور پولیس نے رواں سال کیٹیگری اے کے 584 اور کیٹگری بی کے 2279 سمیت 2863 اشتہاری مجرم گرفتار کئے جبکہ 3391 عادی مجرم اور 6632 عدالتی مفرور بھی گرفتار کئے گئے جن میں کیٹگری اے کے 510 اور کیٹگری بی کے 6122 عدالتی مفرور شامل ہیں۔سربراہ لاہور پولیس بلال صدیق کمیانہ نے بتایا کہ ایلیٹ فورس سمیت تھانوں کی سطح پر تشکیل کردہ سپیشل ٹیمیں سنگین وارداتوں میں ملوث ریکارڈ یافتہ اشتہاری مجرموں کی گرفتاری کے لیے روزانہ کی بنیاد پر ریڈ کر رہی ہیں۔سی سی پی او لاہور نے کہا کہ اپر سب آرڈینیٹس اور انوسٹی گیشن انچارج فہرستوں کے مطابق اشتہاری، عادی مجرم اور عدالتی مفرور پکڑنے کے ذمہ دار ہیں۔بلال صدیق کمیانہ نے مزید کہا کہ تمام ریکارڈ یافتہ اشتہاری، عادی اور عدالتی مفروروں کا سی آر او ڈیٹا بھی اکٹھا کیا گیا ہےجس کی مدد سے سنگین جرائم میں ملوث مجروں کے فنگر پرنٹس سے شناخت اور گرفتاری میں بے حد مدد ملی ہے۔سربراہ لاہور پولیس بلال صدیق کمیانہ نے اس عزم کا اظہار کیا کہ جرائم کی سنگین وارداتوں میں ملوث اشتہاری مجرموں کو گرفتار کریں گے یا انہیں لاہور سے ہمیشہ کے لئے بھاگنے پر مجبور کر دیں گے۔