لاہور میں فری وائی فائی پائلٹ پراجیکٹ،21منزلہ ارفع کریم ٹاور ٹو بنے گا،وزیر اعلیٰ مریم نوازشریف نے منظوری دیدی

لاہور پاکستان(نمائندہ وائس آف جرمنی):‌وزیر اعلیٰ پنجاب مریم نواز شریف کی زیر صدارت آئی ٹی سیکٹر کے حوالے سے خصوصی اجلاس میں منعقد ہوا۔ اجلاس میں وزیر اعلیٰ مریم نواز شریف نے لاہور میں 21منزلہ ارفع کریم ٹاور ٹو بنانے کی منظوری دیدی۔ بریفنگ میں بتایا گیا کہ لاہور میں آئی ٹی، ایجوکیشن اور فلم سٹی پراجیکٹ کا آغاز جلد ہوگاجس کے لئے مائیکروسافٹ،اوریکل اور دیگر بڑی کمپنیوں نے آئی ٹی سٹی لاہور کیلئے آمادگی ظاہر کی ہے۔وزیر اعلیٰ مریم نوازنے ہدایت کی کہ چین کی بڑی آئی ٹی کمپنیوں کو بھی آفس قائم کرنے کے لئے مدعوکیا جائے۔وزیر اعلیٰ مریم نواز شریف نے کہا کہ دنیا بھر سے بہترین آئی ٹی کمپنیوں کو آئی ٹی سٹی میں بزنس کے مواقع فراہم کریں گے۔پنجاب سمیت پاکستان بھر کے طلبا کے لئے ورلڈ بیسٹ یونیورسٹیوں کے کیمپس بنائیں گے۔ وزیر اعلیٰ مریم نواز شریف نے ایجوکیشن سٹی میں دنیا کی بہترین یونیورسٹیوں کے کیمپس قائم کرنے کے لئے فوری رابطوں کی ہدایت کی۔ وزیراعلیٰ مریم نوازشریف نے لاہور نالج پارک اورآئی ٹی سٹی کے قیام کیلئے پلان کی ڈیڈ لائن مقرر کردی ہے۔ اجلاس میں لاہور میں فری وائی فائی پائلٹ پراجیکٹ کی وزیر اعلیٰ مریم نواز نے منظوری دے دی۔لاہور میں 10 مقامات پر فری وائی پراجیکٹ کا آغاز اگلے ماہ کردیا جائے گا۔ لاہور میں 516 مقامات پر فری وائی فائی پوائنٹس بنائے جائیں گے۔وزیر اعلیٰ مریم نواز شریف نے تعلیمی اداروں، ائیرپورٹ،ریلوے سٹیشن اور بس سٹینڈ پر ترجیحاً فری وائی فائی شروع کرنے کی ہدایت کی۔وزیراعلیٰ مریم نوازشریف کی زیر صدارت اجلاس، سی ای اوسی بی ڈی عمران امین نے آئی ٹی سٹی اورلاہورنالج پارک پراجیکٹ کے بارے میں بریفنگ دی۔ سینئر صوبائی وزیر مریم اورنگزیب،صوبائی مشیر پرویز رشید،وزیراطلاعات و ثقافت عظمی زاہد بخاری،ایم پی اے ثانیہ عاشق،چیف سیکرٹری،ایس ایم بی آر،چیئرمین پی اینڈڈی،سیکرٹری ہاؤسنگ، سیکرٹری ہائر ایجوکیشن،سی ای اوسی بی ڈی، برگیڈیئر (ر) منصور جنجوعہ ڈی جی ایل ڈی اے،چیئرمین پی آئی ٹی بی اوردیگرمتعلقہ حکام نے شرکت کی۔