وفاقی وزیر نے پانچ ہزار ملازمتوں کی خوشخبری سنا دی

کراچی میں میڈیا سے گفتگو کرتے ہوئے امین الحق کا کہنا تھا کہ حیدر آباد، جامشورو میں بھی آئی ٹی کے حوالے سے کام کر رہے ہیں، منسٹری آئی ٹی نے ایپ تیار کی، جس میں مختلف چیزوں کو ایک پلیٹ فارم پر جمع کیا گیا۔
اسلام ٹائمز۔ وفاقی وزیر برائے انفارمیشن ٹیکنالوجی امین الحق نے پانچ ہزار نوجوانوں کو روزگار دینے کی خوشخبری سنا دی۔ تفصیلات کے مطابق کراچی پریس کلب میں قائم ہونے والے پہلے منفرد ڈیجیٹل اسٹوڈیو کی افتتاحی تقریب کے بعد گفتگو کرتے ہوئے وفاقی وزیر نے کہا کہ سندھ اور کراچی کی ترقی کے لیے کام جاری رکھیں گے۔ انہوں نے کراچی میں آئی ٹی پارک کا سنگِ بنیاد رکھنے کا اعلان کرتے ہوئے خوش خبری سنائی کہ اس کی تعمیر کے بعد پانچ ہزار نوجوانوں کو روزگار ملے گا۔ امین الحق کا کہنا تھا کہ حیدر آباد، جامشورو میں بھی آئی ٹی کے حوالے سے کام کر رہے ہیں، منسٹری آئی ٹی نے ایپ تیار کی، جس میں مختلف چیزوں کو ایک پلیٹ فارم پر جمع کیا گیا، وزیراعلیٰ سندھ کو بھی ایپ کے لیے خط لکھا مگر انہوں نے کوئی جواب نہیں دیا۔
اُن کا کہنا تھا کہ آئی ٹی کے چینلجز سے آگاہ ہیں، تمام منسٹری پیپر لیس ہوگئی ہے، کیونکہ اب تمام وزارتوں میں لیب ٹاپ پر کام کیا جاتا ہے، کابینہ اجلاس بھی کاغذ کے بغیر کیا جا رہا ہے جبکہ پارلیمنٹ اجلاس کے لیے بھی پیپر لیس کرنے کا منصوبہ تیار کر رہے ہیں۔ امین الحق کا کہنا تھا کہ پاکستان ترقی کے منازل طے کر رہا ہے، کراچی ایپ کے حوالے سے ہم نے منصوبہ تیار کیا ہے، آئی ٹی کی مصنوعات میں سینتالیس فیصد ایکسپورٹ بڑھی ہے، ہم اقدامات کرکے مزید ایکسپورٹ بڑھائیں گے۔ انہوں نے بتایا کہ نائن ون ون ہیلپ لائن پر کام کر رہے ہیں، اس ہیلپ لائن کے نمبر ہر تمام ادارے آن بورڈ ہوں گے۔