ڈی آئی جی آپریشنز سید علی ناصر رضوی کا ون ویلنگ کرنے والوں کے خلاف کاروائی کا حکم

پاکستان لاہور(نمائندہوائس آف جرمنی):ڈی آئی جی آپریشنز سید علی ناصر رضوی نے کہا کہ ون ویلنگ ایک جان لیوا کھیل ہے جس کے نتائج مستقل معذوری یا جان سے ہاتھ دھوناہے۔ہر سال نو جوانوں کی ایک بڑی تعداد اس کھیل کے دوران اپنی جان گنوا دیتی ہے۔انہوں نے کہا کہ ان حادثات کو روکنے کیلئے ضروری ہے کہ ایسے تمام عوامل کی حوصلہ شکنی کی جائے جو اس خونی کھیل کا باعث بنتے ہیں۔پولیس افسران شہر کی اہم شاہراؤں پر ون ویلنگ میں ملوث منچلوں کو گرفت میں لیں۔ڈی آئی جی آپریشنز سید علی ناصر رضوی نے بتایا کہ رواں ماہ کے دوران ون ویلنگ کرنے والوں کے خلاف 126مقدمات درج کئے گئے۔مجموعی طور پرکارروائیوں کے دوران 126ملزمان کو بھی حراست میں لیا گیا۔سید علی ناصر رضوی نے کہا کہ شہریوں کی زندگیاں خطرے میں ڈالنے والے شر پسند عناصر سے کوئی رعایت نہ برتی جائے۔ پولیس افسران فیلڈ میں رہیں اور خلاف ورزی کرنے والوں کے خلاف فوری کاروائی عمل میں لائیں۔ کسی بھی علاقے میں اگر ایسی کوئی شکایت ملی تو متعلقہ افسر کے خلاف کاروائی ہو گی۔ڈی آئی جی آپریشنز سید علی ناصر رضوی نے مزید کہا کہ والدین اپنے بچوں کو جان لیوا کھیل کھیلنے سے روکیں کیونکہ ون ویلنگ کرنے والے افراد خطرناک حادثات کا سبب بنتے ہیں۔اس سلسلہ میں اساتذہ اور سول سو سائٹی اپنی اپنی ذمہ داری ادا کریں۔