پاکستان اور انڈونیشیا کے درمیان دفاعی تعاون کے فروغ پر اتفاق، انڈونیشیا کے وزیر دفاع کی جی ایچ کیو میں فیلڈ مارشل عاصم منیر سے اہم ملاقات

سید عاطف ندیم-پاکستان،وائس آف جرمنی اردو نیوز کے ساتھ
جمہوریہ انڈونیشیا کے وزیر دفاع لیفٹیننٹ جنرل (ر) سجافری سجام الدین نے جنرل ہیڈ کوارٹرز (جی ایچ کیو) راولپنڈی کا دورہ کیا جہاں انہوں نے چیف آف آرمی اسٹاف (COAS) اور چیف آف ڈیفنس اسٹاف (CDF) فیلڈ مارشل سید عاصم منیر، NI (M) HJ سے اہم ملاقات کی۔ اس ملاقات کو پاکستان اور انڈونیشیا کے درمیان دفاعی تعلقات کے فروغ کی جانب ایک اہم پیش رفت قرار دیا جا رہا ہے۔

ذرائع کے مطابق ملاقات میں باہمی دلچسپی کے امور، علاقائی اور عالمی سلامتی کی بدلتی ہوئی صورتحال اور موجودہ تزویراتی چیلنجز پر تفصیلی تبادلہ خیال کیا گیا۔ دونوں ممالک کی قیادت نے اس امر پر اتفاق کیا کہ خطے میں امن و استحکام کے قیام کے لیے قریبی دفاعی تعاون، معلومات کے تبادلے اور مشترکہ حکمت عملی نہایت اہم ہے۔ اس موقع پر دوطرفہ دفاعی تعاون کو مزید وسعت دینے کے لیے مختلف راہوں اور امکانات پر بھی غور کیا گیا۔
ملاقات کے دوران پاکستان اور انڈونیشیا کے درمیان ادارہ جاتی روابط کو مضبوط بنانے، عسکری تربیتی تعاون میں اضافے اور دفاعی صنعتی شعبے میں شراکت داری کو فروغ دینے کی اہمیت پر خصوصی زور دیا گیا۔ دونوں اطراف نے اس بات پر اتفاق کیا کہ مشترکہ تربیتی پروگرامز، عسکری مشقوں اور دفاعی پیداوار کے شعبے میں تعاون سے نہ صرف دونوں ممالک کی دفاعی صلاحیتوں میں اضافہ ہو گا بلکہ باہمی اعتماد اور شراکت داری بھی مزید مستحکم ہو گی۔
انڈونیشیا کے وزیر دفاع لیفٹیننٹ جنرل (ر) سجافری سجام الدین نے پاکستان کی مسلح افواج کی پیشہ ورانہ مہارت، نظم و ضبط اور قربانیوں کو سراہتے ہوئے دہشت گردی کے خلاف جنگ میں ان کے کردار کو قابلِ تحسین قرار دیا۔ انہوں نے دہشت گردی کے ناسور کے خلاف پاکستان کی مسلح افواج اور سیکیورٹی اداروں کی بے مثال قربانیوں کا اعتراف کیا اور کہا کہ پاکستان کا تجربہ اس شعبے میں دیگر ممالک کے لیے بھی قابلِ استفادہ ہے۔
معزز مہمان نے اس عزم کا اظہار کیا کہ انڈونیشیا پاکستان کے ساتھ دفاع، سیکیورٹی، تربیت اور دفاعی صنعت سمیت مختلف شعبوں میں اپنے تعلقات کو مزید وسعت دینا چاہتا ہے۔ ان کا کہنا تھا کہ دونوں ممالک مسلم دنیا کے اہم ممالک ہیں اور مشترکہ اقدار، تاریخی روابط اور علاقائی مفادات انہیں ایک دوسرے کے قریب لاتے ہیں۔
اس موقع پر فیلڈ مارشل سید عاصم منیر نے انڈونیشیا کے وزیر دفاع کا خیر مقدم کرتے ہوئے کہا کہ پاکستان انڈونیشیا کے ساتھ مضبوط، دیرپا اور کثیرالجہتی دفاعی تعلقات کو بے حد اہمیت دیتا ہے۔ انہوں نے اس بات کا اعادہ کیا کہ پاکستان، انڈونیشیا کے ساتھ مشترکہ اقدار، باہمی احترام اور تزویراتی مفادات کے ہم آہنگی پر مبنی دفاعی تعاون کو مزید فروغ دینے کے لیے پرعزم ہے۔
فیلڈ مارشل عاصم منیر نے کہا کہ بدلتے ہوئے عالمی اور علاقائی سیکیورٹی ماحول میں پاکستان اور انڈونیشیا جیسے دوست ممالک کے درمیان قریبی تعاون وقت کی اہم ضرورت ہے۔ انہوں نے اس امید کا اظہار کیا کہ دونوں ممالک کے درمیان دفاعی شراکت داری مستقبل میں مزید مضبوط ہو گی اور یہ تعاون خطے میں امن، استحکام اور خوشحالی کے فروغ میں اہم کردار ادا کرے گا۔
دفاعی ماہرین کے مطابق انڈونیشیا کے وزیر دفاع کا یہ دورہ پاکستان اور انڈونیشیا کے درمیان دفاعی تعلقات کو نئی جہت دینے کا باعث بن سکتا ہے، خاص طور پر ایسے وقت میں جب خطے اور دنیا کو متعدد سیکیورٹی چیلنجز کا سامنا ہے۔ ملاقات کے اختتام پر دونوں فریقین نے باہمی تعاون کو مزید گہرا کرنے اور مستقبل میں اعلیٰ سطحی روابط جاری رکھنے پر اتفاق کیا۔