لاہور میں سرچ اینڈ کومبنگ آپریشنز جاری، 24 اشتہاری گرفتار، ناجائز اسلحہ کے 11 مقدمات درج
پولیس کے مطابق 181 دکانیں، 79 ہوٹلز، 35 گیسٹ ہاؤسز، 12 دیگر رہائشی ہوٹلز اور 16 گوداموں کی چیکنگ کی گئی۔ اس دوران مختلف قوانین کی خلاف ورزیوں پر 70 افراد کے خلاف قانونی کارروائی بھی کی گئی
سید عاطف ندیم-پاکستان،وائس آف جرمنی اردو نیوز کے ساتھ
لاہور: صوبہ پنجاب کے دارالحکومت لاہور میں امن و امان کی صورتحال کو مزید بہتر بنانے کے لیے لاہور پولیس کی جانب سے سرچ اینڈ کومبنگ آپریشنز کا سلسلہ بھرپور انداز میں جاری ہے۔ ترجمان لاہور پولیس کے مطابق ماہِ جنوری کے دوران اب تک شہر بھر میں 400 سے زائد سرچ آپریشنز کیے جا چکے ہیں جن کے دوران اہم کامیابیاں حاصل کی گئی ہیں۔
ترجمان کے مطابق ان آپریشنز کے دوران 13 ہزار سے زائد گھروں کی چیکنگ کی گئی جبکہ 5 ہزار سے زائد کرایہ داروں کا ڈیٹا چیک کیا گیا۔ اس کے علاوہ 39 ہزار سے زائد افراد کی شناختی تصدیق اور جانچ پڑتال بھی عمل میں لائی گئی تاکہ کسی بھی مشکوک سرگرمی کو بروقت روکا جا سکے۔
سرچ آپریشنز کے دوران مختلف کاروباری و رہائشی مقامات کی بھی کڑی نگرانی کی گئی۔ پولیس کے مطابق 181 دکانیں، 79 ہوٹلز، 35 گیسٹ ہاؤسز، 12 دیگر رہائشی ہوٹلز اور 16 گوداموں کی چیکنگ کی گئی۔ اس دوران مختلف قوانین کی خلاف ورزیوں پر 70 افراد کے خلاف قانونی کارروائی بھی کی گئی۔
لاہور پولیس کا کہنا ہے کہ سرچ اینڈ کومبنگ آپریشنز کے دوران 24 اشتہاری مجرمان کو گرفتار کیا گیا جبکہ ناجائز اسلحہ برآمد ہونے پر 11 مقدمات درج کیے گئے۔ مزید برآں کرایہ داری ایکٹ کے تحت 18 مقدمات درج کیے گئے جبکہ ضابطہ فوجداری کی دفعات 55/109 کے تحت 8 افراد کو حراست میں لیا گیا۔
سربراہ لاہور پولیس بلال صدیق کمیانہ کا کہنا ہے کہ صوبائی دارالحکومت میں قیامِ امن کو ہر صورت یقینی بنایا جائے گا اور اس مقصد کے لیے سرچ اینڈ کومبنگ آپریشنز بلا تعطل جاری رہیں گے۔ انہوں نے سی سی پی او لاہور کی ہدایت کا حوالہ دیتے ہوئے کہا کہ شہر کے تمام انٹری اور ایگزٹ پوائنٹس پر سخت چیکنگ کو یقینی بنایا جائے تاکہ جرائم پیشہ عناصر کی نقل و حرکت کو روکا جا سکے۔
بلال صدیق کمیانہ نے افسران اور جوانوں کو ہدایت کی ہے کہ وہ اپنے اپنے علاقوں میں متحرک رہتے ہوئے فرائض سرانجام دیں اور شہریوں کی جان و مال کے تحفظ کے لیے کوئی کسر اٹھا نہ رکھی جائے۔ انہوں نے واضح کیا کہ جرائم پیشہ عناصر کی سرکوبی کے لیے لاہور پولیس کا عزم غیر متزلزل ہے اور شہر میں امن و امان برقرار رکھنے کے لیے تمام دستیاب وسائل بروئے کار لائے جا رہے ہیں۔
لاہور پولیس کے مطابق شہریوں کے تعاون سے یہ آپریشنز مزید مؤثر ثابت ہو رہے ہیں اور مستقبل میں بھی شہر کو محفوظ بنانے کے لیے سخت اقدامات جاری رکھے جائیں گے۔
