ٹرمپ: دوحہ میں منگل کو ایران سے میٹنگ ہو گی، ایلچی وِٹکوف اور کشنر شریک ہوں گے

رائٹرز کے ساتھ
امریکہ نے کہا ہے کہ ایران کے بارے میں ایک اعلیٰ سطحی اجلاس منگل کو دوحہ میں منعقد ہو گا جس میں صدر ڈونلڈ ٹرمپ کے اعلیٰ ترین ایلچی سٹیو وِٹکوف اور جیرڈ کشنر شرکت کریں گے جبکہ تکنیکی مذاکرات بھی ساتھ جاری رہیں گے۔
پیر کو ایک سوشل میڈیا پوسٹ میں ٹرمپ نے تفصیلات بتائے بغیر کہا کہ ایران نے ملاقات کی درخواست کی تھی اور یہ قطری دارالحکومت میں ہو گی۔
چند لمحوں بعد ٹرمپ کی پریس سکریٹری کیرولین لیویٹ نے فاکس نیوز کو بتایا کہ وِٹکوف اور کشنر مذاکرات میں شرکت کریں گے۔
انہوں نے کہا، "خصوصی ایلچی وِٹکوف اور جیرڈ کشنر اس ہفتے اعلیٰ سطحی ملاقاتوں کے لیے دوحہ جائیں گے جیسا کہ ہم مفاہمتی یادداشت پر بات چیت جاری رکھے ہوئے ہیں۔ ان اعلیٰ سطحی مذاکرات کے موقع پر تکنیکی بات چیت ہو گی۔”
لیویٹ نے مزید کہا، "جہاں تک ہمارا تعلق ہے، ہم نے اپنی طرف سے جنگ بندی برقرار رکھی ہوئی ہے۔ تشدد کا مقابلہ تشدد سے کیا جائے گا۔”
مذاکرات میں واپسی کئی دنوں کے دوطرفہ حملوں کے بعد ہو گی۔ جمعرات کو ایک ایرانی پراجیکٹائل نے آبنائے میں ایک کارگو جہاز کو نشانہ بنایا تھا۔
لیویٹ نے "فاکس اینڈ فرینڈز” پروگرام میں کہا، "تجارتی جہازوں پر حملے ہوئے جن کا امریکہ نے صدر کی ہدایت پر جواب دیا اور یہ ہوتا رہے گا لیکن ہم امید کرتے ہیں کہ ایسا نہ ہو۔ صدر واضح طور پر امن عمل کو واقع ہوتا دیکھنا چاہتے ہیں۔”