علیمہ خان کو لاہور میں گرفتار کر لیا گیا، پی ٹی آئی کا دعویٰ
پی ٹی آئی نے 27 ستمبر کو عمران خان کی رہائی کے مطالبے کے لیے احتجاجی مارچ کا اعلان کر رکھا ہے۔
ذرائع کے ساتھ
پاکستان کے سابق وزیراعظم اور تحریک انصاف کے بانی عمران خان کی بہن علیمہ خان کو لاہور میں ان کے گھر کے باہر سے گرفتار کر لیا گیا ہے۔
پی ٹی آئی کے پنجاب کے ترجمان نے اتوار کو علیمہ خان کی گرفتاری کی تصدیق کرتے ہوئے حکومت پر انہیں ’’اغوا‘‘ کرنے کا الزام عائد کیا۔
ایکس پر جاری کردہ پارٹی کے ایک بیان میں کہا گیا ہے کہ حکومت نے علیمہ خان کو ان کے گھر کے باہر سے حراست میں لیا ہے۔
پی ٹی آئی کے برطانیہ میں مقیم رہنما زلفی بخاری نے علیمہ خان کی گرفتاری کی مذمت کرتے ہوئے کہا کہ یہ کارروائی 27 ستمبر کو ہونے والے احتجاج کے خوف کا نتیجہ ہے۔
پی ٹی آئی نے 27 ستمبر کو عمران خان کی رہائی کے مطالبے کے لیے احتجاجی مارچ کا اعلان کر رکھا ہے۔
دوسری جانب حکومت کے ترجمان اور پولیس نے علیمہ خان کی گرفتاری پر روئٹرز کی جانب سے تبصرے کی درخواست کا فوری طور پر جواب نہیں دیا۔
مقامی ذرائع کے مطابق علیمہ خان کو مینٹیننس آف پبلک آرڈر، ایم پی او کے تحت حراست میں لیا گیا ہے، تاہم پولیس کی جانب سے اس کی باضابطہ تصدیق سامنے نہیں آئی۔
