ہیڈکوارٹرز پاکستان ائیرپورٹس اتھارٹی، جناح انٹرنیشنل ائیرپورٹ ٹرمینل ون کراچی

احسان احمد-ادارت
کراچی- وفاقی وزیر برائے توانائی (پاور ڈویژن) سردار اویس احمد خان لغاری نے پیر کے روز ڈی جی خان ایئرپورٹ (FAKL) کے اپ گریڈیشن منصوبے کا دورہ کیا اور جاری ترقیاتی کاموں کی پیش رفت کا جائزہ لیا۔ منصوبے کی لاگت 5 ارب 20 کروڑ روپے ہے، جبکہ اسے دسمبر 2027ء تک مکمل کرنے کا ہدف مقرر کیا گیا ہے۔
وفاقی وزیر کے ہمراہ اراکین قومی و صوبائی اسمبلی اور دیگر شخصیات بھی موجود تھیں، جن میں سردار عمار احمد خان لغاری (رکن قومی اسمبلی)، سردار اسامہ فیاض خان لغاری (رکن صوبائی اسمبلی)، سردار یوسف خان لغاری (سابق رکن صوبائی اسمبلی)، سردار علی یوسف خان لغاری (رکن صوبائی اسمبلی)، انس عبد الکریم اور سید عبدالعلیم شاہ (سابق رکن صوبائی اسمبلی) شامل تھے۔

منصوبے کے مقام پر پہنچنے پر پراجیکٹ مینجمنٹ یونٹ (PMU) اور ایئرپورٹ مینیجر نے وفد کا مشترکہ استقبال کیا۔ وفاقی وزیر کو منصوبے کی پیش رفت اور نمایاں خصوصیات پر بریفنگ دی گئی، جس کے بعد انہوں نے منصوبے کے مقام کا دورہ کیا۔
وفاقی وزیر نے جاری کام کی پیش رفت اور معیار پر اطمینان کا اظہار کرتے ہوئے وزیراعظم، وزارتِ دفاع اور پاکستان ایئرپورٹس اتھارٹی (PAA) کی قیادت کی جانب سے ہوائی اڈوں کی ترقی کے لیے کی جانے والی کوششوں کو سراہا۔ انہوں نے وزارتِ دفاع اور پی اے اے انتظامیہ کی کاوشوں پر شکریہ بھی ادا کیا۔
دورے کے دوران وفاقی وزیر نے پی ایم یو کیمپ آفس میں پلومیریا کا پودا لگایا۔ اس موقع پر پی اے اے انتظامیہ کی جانب سے انہیں یادگاری شیلڈ بھی پیش کی گئی۔
اسٹیٹ لاؤنج میں میڈیا سے گفتگو کرتے ہوئے وفاقی وزیر نے منصوبے کی نمایاں خصوصیات بیان کیں اور اس کی پیش رفت اور معیار پر اطمینان کاخ اظہار کیا۔ روانگی سے قبل انہوں نے منصوبے کے جدید اور منظم ماحول اور جاری کام کو سراہتے ہوئے ڈیرہ غازی خان اور وسیع تر جنوبی پنجاب کی ترقی کے لیے اس کی اہمیت اجاگر کی۔
5 ارب 20 کروڑ روپے کی لاگت سے جاری یہ منصوبہ دسمبر 2027ء تک مکمل کرنے کا ہدف رکھتا ہے اور خطے میں ہوائی اڈوں کے بنیادی ڈھانچے کی ترقی کی جانب ایک اہم پیش رفت ہے۔