ایرانی پاسداران انقلاب کی بحریہ کا سات جہازوں کو نشانہ بنانے کا دعویٰ
28 فروری کو ایران جنگ شروع ہونے کے بعد سے آبنائے ہرمز میں ایک ہی دن کے دوران متاثر ہونے والے جہازوں کی یہ سب سے بڑی تعداد
ایرانی رپورٹ
ایرانی سرکاری ٹیلی ویژن نے بتایا ہے کہ بدھ اور جمعرات کی شب آبنائے ہرمزمیں سات آئل ٹینکروں پر حملے کیے گئے یا وہ بحری بارودی سرنگوں سے ٹکرا گئے، جس کے نتیجے میں ان میں آگ لگ گئی اور انہیں نقصان پہنچا۔
اگر اس خبر کی تصدیق ہو جاتی ہے تو یہ 28 فروری کو ایران جنگ شروع ہونے کے بعد سے آبنائے ہرمز میں ایک ہی دن کے دوران متاثر ہونے والے جہازوں کی یہ سب سے بڑی تعداد ہو سکتی ہے۔
ایرانی رپورٹ میں پاسداران انقلاب کی بحریہ کے بیان کا حوالہ دیتے ہوئے کہا گیا ہے کہ چار آئل ٹینکر تیل کی منتقلی میں مصروف تھے، جب انہیں نشانہ بنایا گیا اور ان میں آگ بھڑک اُٹھی۔ مزید تین ٹینکر بحری بارودی سرنگوں سے ٹکرانے کے بعد متاثر ہوئے اور ناکارہ ہو گئے۔
رپورٹ میں ممکنہ جانی نقصان یا متاثرہ ٹینکروں کے پرچموں سے متعلق تفصیلات فراہم نہیں کی گئیں۔
بیان میں خبردار کیا گیا ہے کہ آبنائے ہرمز میں تیل بردار جہازوں کی آمد و رفت کے لیے امریکہ کی جانب سے ’’غیر قانونی راستے‘‘ کھلوانے کی کسی بھی کوشش کے جواب میں پاسدارانِ انقلاب کی کارروائیوں کا دائرہ خطے میں موجود امریکی فوجی اڈوں تک بڑھایا جا سکتا ہے۔
