سید عاطف ندیم-پاکستان، وائس آف جرمنی اردو نیوز کے ساتھ:
پاک بحریہ کی کمانڈ اینڈ اسٹاف کانفرنس نیول ہیڈکوارٹرز اسلام آباد میں اختتام پذیر ہوگئی۔ کانفرنس کی صدارت چیف آف دی نیول اسٹاف ایڈمرل نوید اشرف، NI، NI (M) نے کی۔ اس اعلیٰ سطحی اجلاس میں پرنسپل اسٹاف آفیسرز، فیلڈ کمانڈرز اور دیگر سینئر نیول حکام نے شرکت کی۔
کانفرنس کے دوران پاک بحریہ کی مجموعی آپریشنل تیاریوں، جاری منصوبوں اور مستقبل کے اہداف کا تفصیلی جائزہ لیا گیا۔ فورم نے خطے کی تیزی سے بدلتی ہوئی جیو اسٹریٹجک صورتحال، سمندری سلامتی کے روایتی و غیر روایتی چیلنجز، اور میری ٹائم ڈومین میں ابھرتے ہوئے خطرات پر بھی غور کیا۔
ایڈمرل نوید اشرف نے اجلاس سے خطاب کرتے ہوئے کہا کہ قومی خودمختاری کے تحفظ اور میری ٹائم سرحدوں کے دفاع کے لیے پاک بحریہ ہر لمحہ تیار ہے۔ انہوں نے اس بات پر زور دیا کہ خطے میں امن و استحکام کو برقرار رکھنے اور میری ٹائم سیکیورٹی کو مضبوط بنانے میں پاک بحریہ کا کردار نہایت اہم اور کلیدی ہے۔ چیف آف دی نیول اسٹاف نے افسران پر زور دیا کہ وہ جدید حربی تقاضوں کے مطابق اپنی پیشہ ورانہ مہارت میں اضافہ کریں اور کسی بھی ممکنہ خطرے سے نمٹنے کے لیے ہمہ وقت چوکس رہیں۔
انہوں نے مزید کہا کہ موجودہ جیو پولیٹیکل حالات میں میری ٹائم سیکیورٹی کو یقینی بنانا نہ صرف ملکی دفاع بلکہ معیشت کے استحکام کے لیے بھی ناگزیر ہے۔ انہوں نے کہا کہ پاک بحریہ علاقائی اور بین الاقوامی سطح پر اپنی ذمہ داریاں پوری سنجیدگی سے انجام دے رہی ہے اور دوست ممالک کے ساتھ مشترکہ مشقوں اور تعاون کے ذریعے میری ٹائم خطے میں امن و استحکام کے فروغ میں اپنا فعال کردار ادا کر رہی ہے۔
کانفرنس کے شرکاء کو پاکستان انٹرنیشنل میری ٹائم ایکسپو اینڈ کانفرنس (PIMEC) کی تیاریوں پر بھی تفصیلی بریفنگ دی گئی۔ یہ ایونٹ پاکستان کی بحری صلاحیتوں کو دنیا کے سامنے پیش کرنے اور میری ٹائم شعبے میں علاقائی تعاون کو فروغ دینے کے لیے ایک اہم پلیٹ فارم فراہم کرے گا۔ شرکاء نے PIMEC کی کامیاب اور مؤثر میزبانی کے لیے مکمل تیاریوں کو یقینی بنانے پر زور دیا۔
کمانڈ اینڈ اسٹاف کانفرنس پاک بحریہ کا اعلیٰ ترین فیصلہ ساز فورم ہے، جس میں تزویراتی ترجیحات کا تعین، آپریشنل منصوبہ بندی کا جائزہ اور پالیسی سازی کے اہم فیصلے کیے جاتے ہیں۔ یہ فورم اس امر کو یقینی بناتا ہے کہ پاک بحریہ کی حکمتِ عملی اور آپریشنل صلاحیتیں قومی سلامتی کے اہداف سے ہم آہنگ رہیں۔
کانفرنس کے اختتام پر چیف آف دی نیول اسٹاف نے وطنِ عزیز کی سالمیت اور سمندری سرحدوں کے دفاع کے لیے اپنی مکمل عزمِ نو کا اعادہ کیا اور کہا کہ پاک بحریہ جدید تقاضوں سے ہم آہنگ، تربیت یافتہ اور ہر لحاظ سے مستعد فورس ہے جو کسی بھی جارحیت کا بھرپور جواب دینے کی صلاحیت رکھتی ہے۔
