امریکا میں مقیم پاکستانی نوجوان پاکستان کی ترقی میں بھرپور کردار ادا کریں: وزیراعظم شہباز شریف

سید عاطف ندیم-ادارت وزیراعظم آفس کے ساتھ
نیویارک: وزیراعظم محمد شہباز شریف سے امریکا میں مقیم پاکستانی برادری اور پاکستانی نوجوانوں کے وفود نے الگ الگ ملاقاتیں کیں، جن میں پاکستان کی ترقی، نوجوانوں کو بااختیار بنانے، انفارمیشن ٹیکنالوجی، مصنوعی ذہانت، صحت، کاروبار اور سماجی شعبوں میں تعاون کے امکانات پر تبادلہ خیال کیا گیا۔
امریکا میں مقیم پاکستانی نوجوانوں کے وفد میں شعبہ صحت، انفارمیشن ٹیکنالوجی، مصنوعی ذہانت، سماجی کاروبار اور مختلف یوتھ غیر سرکاری تنظیموں سے وابستہ سربراہان اور ماہرین شامل تھے۔ وزیراعظم محمد شہباز شریف نے وفد کا خیرمقدم کرتے ہوئے کہا کہ بیرون ملک مقیم باصلاحیت پاکستانی نوجوان ان سمیت پوری قوم کا فخر ہیں اور پاکستان کی ترقی میں ان کا کردار انتہائی اہم ہے۔

وزیراعظم نے کہا کہ انہیں پختہ یقین ہے کہ پاکستان کی تقدیر نوجوان نسل ہی بدل سکتی ہے۔ انہوں نے پاکستانی نوجوانوں پر زور دیا کہ وہ اپنی صلاحیتوں، تجربے اور جدید شعبوں میں حاصل کردہ مہارت کو پاکستان کی ترقی اور خوشحالی کے لیے بروئے کار لائیں۔
وزیراعظم نے امریکا میں مقیم پاکستانی نوجوانوں کو پاکستان کے مختلف شعبوں میں بہتری کے لیے اپنی تجاویز پیش کرنے کی دعوت دیتے ہوئے کہا کہ حکومت نوجوان نسل کی آرا کو اہمیت دیتی ہے اور ان کی صلاحیتوں سے فائدہ اٹھانے کے لیے مواقع پیدا کرنا چاہتی ہے۔
محمد شہباز شریف نے کہا کہ حکومت پاکستان بھر کے نوجوانوں کو بااختیار بنانے کے لیے انفارمیشن ٹیکنالوجی، مصنوعی ذہانت اور جدید ہنر کی تعلیم و تربیت پر توجہ دے رہی ہے۔ ان کے مطابق موجودہ دور میں ٹیکنالوجی اور جدید مہارتیں نوجوانوں کے لیے روزگار، کاروبار اور عالمی سطح پر مسابقت کے نئے مواقع پیدا کر رہی ہیں، اس لیے پاکستانی نوجوانوں کو ان شعبوں میں آگے بڑھنے کے لیے زیادہ سے زیادہ سہولتیں فراہم کرنا ضروری ہے۔
وزیراعظم نے نوجوانوں کی تعلیم اور فنی تربیت کے حوالے سے اپنے سابقہ اقدامات کا ذکر کرتے ہوئے کہا کہ پنجاب کے وزیراعلیٰ کی حیثیت سے باصلاحیت نوجوانوں میں لیپ ٹاپ تقسیم کرنے، طلبہ و طالبات کے لیے وظائف فراہم کرنے اور معاشی طور پر کمزور خاندانوں کے بچوں کو دانش اسکولز کے ذریعے معیاری تعلیم کے مواقع فراہم کرنے کا سلسلہ شروع کیا گیا تھا۔
انہوں نے کہا کہ بطور وزیراعظم بھی نوجوانوں اور کم وسائل رکھنے والے طلبہ کے لیے ایسے اقدامات کا سلسلہ جاری رکھا جا رہا ہے۔ وزیراعظم کے مطابق حکومت کا مقصد یہ ہے کہ مالی وسائل کی کمی کسی باصلاحیت بچے کی تعلیم اور ترقی کی راہ میں رکاوٹ نہ بنے۔
وزیراعظم نے کہا کہ معاشی طور پر کمزور بچوں کو دانش اسکولز کے ذریعے بین الاقوامی معیار کی تعلیم فراہم کرنے کے ساتھ ساتھ اب عالمی معیار کی دانش یونیورسٹی کے قیام کی جانب بھی پیش رفت کی جا رہی ہے۔ ان کے مطابق معیاری تعلیم تک رسائی کو وسعت دینا اور نوجوانوں کو جدید تقاضوں سے ہم آہنگ کرنا حکومت کی ترجیحات میں شامل ہے۔
محمد شہباز شریف نے کہا کہ پاکستان کے نوجوانوں کی ترقی کے لیے امریکا میں مقیم پاکستانی ماہرین اور نوجوانوں کی تجاویز کا خیرمقدم کیا جائے گا۔ انہوں نے کہا کہ بیرون ملک مقیم پاکستانیوں نے مختلف شعبوں میں اپنی صلاحیتوں کا لوہا منوایا ہے اور ان کے تجربات پاکستان کے لیے مفید ثابت ہوسکتے ہیں۔
ملاقات کے دوران نوجوانوں نے بھی وزیراعظم سے مختلف امور پر اپنے خیالات کا اظہار کیا اور پاکستان میں نوجوانوں کے لیے مواقع پیدا کرنے، آئی ٹی کے شعبے کے فروغ، مصنوعی ذہانت، کاروبار اور روزگار کے امکانات سے متعلق تجاویز پیش کیں۔
امریکا میں مقیم پاکستانی نوجوانوں نے وزیراعظم کی جانب سے نوجوانوں کی ترقی، بالخصوص انفارمیشن ٹیکنالوجی، جدید ہنر اور کاروبار میں آسانی پیدا کرنے کے لیے کیے جانے والے اقدامات کو سراہا۔ وفد کے ارکان نے اس امر پر بھی زور دیا کہ بیرون ملک مقیم پاکستانی نوجوان پاکستان کے ساتھ اپنے روابط مزید مضبوط بنانے اور ملک کی ترقی میں اپنا کردار ادا کرنے کے خواہاں ہیں۔
وزیراعظم نے نوجوانوں کے ساتھ ملاقات کو اہم قرار دیتے ہوئے کہا کہ پاکستان کی بڑی نوجوان آبادی ملک کے لیے ایک اہم اثاثہ ہے۔ انہوں نے اس بات پر زور دیا کہ نوجوانوں کو تعلیم، جدید ٹیکنالوجی، ہنر اور کاروباری مواقع فراہم کرکے انہیں قومی ترقی کے عمل میں مؤثر شراکت دار بنایا جا سکتا ہے۔
دوسری جانب وزیراعظم محمد شہباز شریف سے امریکا میں مقیم پاکستانی برادری کے نمائندوں نے بھی علیحدہ ملاقات کی۔ ملاقاتوں میں بیرون ملک مقیم پاکستانیوں کے پاکستان کے ساتھ روابط، ان کی خدمات اور ملک کی ترقی میں ان کے کردار سے متعلق امور پر گفتگو ہوئی۔
ملاقاتوں کے دوران وزیراعظم کے چیئرمین یوتھ پروگرام رانا مشہود احمد خان، وزیراعظم کے معاون خصوصی بلال بن ثاقب، اقوام متحدہ میں پاکستان کے مستقل مندوب عاصم افتخار، امریکا میں پاکستان کے سفیر رضوان احمد شیخ، وزیراعظم کے غیر ملکی ذرائع ابلاغ کے ترجمان مشرف زیدی، اوورسیز پاکستانیز فاؤنڈیشن کے چیئرمین سید قمر رضا، مینیجنگ ڈائریکٹر اوورسیز پاکستانیز فاؤنڈیشن افضال بھٹی اور متعلقہ اعلیٰ حکام بھی موجود تھے۔
وزیراعظم نے امریکا میں مقیم پاکستانی برادری اور نوجوانوں کے نمائندوں سے ملاقاتوں کے دوران اس امر پر زور دیا کہ بیرون ملک مقیم پاکستانی نہ صرف پاکستان کے معاشی اور سماجی روابط کا اہم حصہ ہیں بلکہ جدید علوم، ٹیکنالوجی، سرمایہ کاری اور عالمی تجربات کے ذریعے ملک کی ترقی میں بھی مؤثر کردار ادا کرسکتے ہیں۔
انہوں نے نوجوانوں پر زور دیا کہ وہ پاکستان کے ساتھ اپنے تعلقات کو مزید مضبوط بنائیں اور اپنی مہارتوں اور تجربات کو ملک کے لیے بروئے کار لانے کے مواقع تلاش کریں۔ وزیراعظم نے یقین دلایا کہ حکومت نوجوانوں کو جدید تعلیم، ہنر اور ٹیکنالوجی سے آراستہ کرنے کے لیے اقدامات جاری رکھے گی۔
وزیراعظم محمد شہباز شریف نے کہا کہ پاکستان کی ترقی کا راستہ نوجوان نسل کو معیاری تعلیم، جدید ہنر، ٹیکنالوجی اور کاروباری مواقع فراہم کرنے سے گزرتا ہے۔ انہوں نے کہا کہ حکومت ملک کے نوجوانوں کو مستقبل کے تقاضوں کے مطابق تیار کرنے اور انہیں ملکی و عالمی سطح پر آگے بڑھنے کے مواقع فراہم کرنے کے لیے اپنی کوششیں جاری رکھے گی۔